Elde ınternettegi zańsyz kontentti anyqtaý tártibi ózgeredi
ASTANA. KAZINFORM — Aqparattyq keńistikte quqyqqa qaıshy kontentti anyqtaý jáne ony buǵattaý sharalaryn qabyldaý maqsatynda monıtorıng júrgizý qaǵıdalaryn bekitý týraly buıryq jobasy «Ashyq NQA» portalynda qoǵamdyq talqylaýǵa usynyldy.
Qujatty Qarjylyq monıtorıng agenttigi «Quqyq buzýshylyq profılaktıkasy týraly» zańǵa sáıkes ázirlegen.
Jobaǵa sáıkes, qaǵıdalar ýákiletti organnyń quzyreti sheginde aqparattyq keńistikke, onyń ishinde ınternet jelisine monıtorıng júrgizý tártibin aıqyndaıdy. Sondaı-aq qujatta monıtorıng júrgizý barysynda quqyqqa qaıshy kontentti anyqtaý jáne onyń ınternet jelisindegi qoljetimdiligin shekteý (buǵattaý) boıynsha sharalar qabyldaý kózdelgen.
Atalǵan is-sharalardy júzege asyrý merzimi normatıvtik quqyqtyq akt qoldanysqa engizilgen sátten bastap júzege asyrylady.
Aıta keteıik, onlaın-platforma ókildikterine quqyqqa qaıshy kontentti joıý jónindegi ýákiletti organnyń nusqamalaryn oryndamaǵany úshin ákimshilik jaýapkershilik engiziledi.
Sonymen qatar Úkimet balalardy zııandy kontentten qorǵaý maqsatynda áleýmettik jelilerge jasyna qaraı shekteý engizý máselesin talqylap jatyr. Oǵan qosa byltyr 34 myńnan astam zııandy kontent jabylǵanyn jazǵanbyz.
Sondaı-aq, jasóspirimderdi zııandy kontentten qorǵaýdaǵy jahandyq tájirıbe jáne Qazaqstannyń ustanymy jaıly silteme arqyly oqı alasyz.