Elde ınsýlt pen obyrdy erte anyqtaýǵa arnalǵan JI-servıster keńeıtiledi
ASTANA. KAZINFORM — Qazaqstanda áleýmettik máni bar aýrýlardy erte dıagnostıkalaýǵa jáne medıtsına qyzmetkerlerin qoldaýǵa baǵyttalǵan densaýlyq saqtaýdaǵy basym JI-jobalardyń tizbesi qalyptastyryldy, dep habarlaıdy DSM baspasóz qyzmeti.
Negizgi baǵyttardyń qataryna ınsýlt, ókpe jáne sút bezi obyryn erte dıagnostıkalaý, sondaı-aq jasandy ıntellektti qoldana otyryp, stomatologııalyq sýretterdi taldaý jatady. Bul sheshimder qazirdiń ózinde praktıkalyq densaýlyq saqtaý salasynda engizilip, keńeıtilip jatyr.
Búgingi tańda otandyq medıtsına mamandary túrli JI-servısterdi belsendi qoldanady. Osylaısha, Cerebra 5 óńirdegi II jáne III sanattaǵy 9 ınsýlt ortalyǵynda, WDsoft sheshimi 10 óńirdegi 190 medıtsınalyq uıymda, AIDENTIS platformasy 65 stomatologııalyq klınıkada jáne 3 medıtsınalyq JOO-da engizildi. ALIMA medıtsına qyzmetkeriniń JI-assıstenti búkil el boıynsha 700-den astam emhanada qoldanylady.
— Respýblıkalyq elektrondyq densaýlyq saqtaý ortalyǵy kórsetilgen medıtsınalyq qyzmetterdiń avtomattandyrylǵan monıtorıngi, klınıkalyq sheshimder qabyldaýdy qoldaý, dáriger men patsıentti habardar ete otyryp, zerthanalyq taldaýlardaǵy aýytqýlardy anyqtaý, sondaı-aq medıtsınalyq uıymdar men suranys boıynsha mamandar týraly ózekti aqparatty usyný úshin AI-agentterin pysyqtap jatyr. Jobalardy iske asyrý 8 grafıkalyq protsessordy qosa alǵanda, bólingen JITsDM esepteý resýrstaryn paıdalana otyryp, sondaı-aq API-ınterfeısterge qol jetkizýdi qamtamasyz etý arqyly júzege asyrylady, — delingen habarlamada.
Keleshekte SmartEKG sheshimderiniń negizinde dárilik zattar men medıtsınalyq buıymdarǵa saraptama júrgizý, sozylmaly júrek jetkiliksizdigin erte anyqtaý boıynsha jobalardy engizý úshin JI-quraldaryn engizý josparlanyp otyr.
Buǵan deıin Qazaqstanda ınsýlt pen gepatıtti erte anyqtaý boıynsha jańa zertteý engizilgeni anyqtaldy.