Elde ınsýlt ortalyqtarynyń jelisi keńeıdi - Álnazarova
ASTANA. KAZINFORM – Ońaltý qyzmetiniń sapasyn jaqsartý baǵytynda standarttar jańartyldy. Bul týraly Úkimet otyrysynda ınklıýzıvti saıasatty júzege asyrý sharalaryn talqylaý kezinde Densaýlyq saqtaý mınıstri Aqmaral Álnazarova málim etti.
- Elimizde ınsýlt ortalyqtarynyń jelisi qarqyndy damyp keledi. Qazirgi ýaqytta zamanaýı jabdyqtalǵan 85 ortalyq qajettilikti tolyq qamtıdy. Infarkt kezinde ýaqyt joǵaltpaı «altyn saǵat» qaǵıdatyn ustanýǵa múmkindik beretin 48 koronografııa ortalyǵy jumys istep tur. Osyndaı ortalyqtar Memleket basshysynyń tapsyrmasymen iske asyrylyp jatqan «Aýyldyq medıtsınany jańǵyrtý» Ulttyq jobasy aıasyndaǵy 32 aýdanaralyq aýrýhananyń janynda da ashylyp jatyr (11 ınsýlttik, 7 koronografııa ortalyqtary), - dedi A.Álnazarova.
Onyń aıtýynsha, elimizdegi aýrýhanalardaǵy 98 myń tósek orynnyń 12 myńy tek ońaltýǵa arnalǵan, bul jalpy qordyń 13%-y. Ońaltý qyzmetiniń sapasyn jaqsartý baǵytynda ońaltý standarttary jańartylyp, klınıkalarǵa qoıylatyn talaptar kúsheıtildi.
Budan buryn habarlanǵandaı, bıyl ınklıýzıvti jumyspen qamtý múmkindigi keńeıtiledi.
