Elde ınklıýzıvti bilim berýdi damytýdyń jańa kezeńi bastaldy

ASTANA.KAZINFORM — Qazaqstanda alǵash ret Inklıýzıvti bilim berý jónindegi álemdik kongress ótti. Bul týraly Oqý-aǵartý mınıstrliginiń baspasóz qyzmeti habarlady. 

Bul aýqymdy halyqaralyq is-shara pedagogterdiń kásibı quzyretterin arttyrýǵa, ınklıýzıvti mádenıetti damytýǵa jáne ınklıýzıvti bilim berý salasyndaǵy jahandyq dıalogtyń jańa kezeńin bastaýǵa serpin berdi.

Inklıýzıvti bilim berýdi júıeli damytý maqsatynda mektepke deıingi uıymdarda jáne kásibı-tehnıkalyq bilim berý uıymdarynda pedagog-assıstent shtattary engizildi. Bul bastama erekshe bilim berý qajettilikteri bar balalarǵa jeke qoldaý kórsetýge múmkindik berdi. Qazirgi tańda elimizdiń bilim berý uıymdarynda 3,8 myń pedagog-assıstent jáne 10 275 arnaıy pedagog qyzmet atqaryp jatyr.

Sondaı-aq mektepterde múmkindigi shekteýli jáne ómirlik qıyn jaǵdaıǵa tap bolǵan balalarǵa jeke kómekshi laýazymy engizildi. Nátıjesinde 129 erekshe bilim berý qajettilikteri bar balaǵa fızıkalyq súıemeldeý kórsetildi, onyń ishinde buryn úıde oqyǵan 45 bala jalpy bilim beretin mektepterde bilim alýǵa múmkindik aldy.

Elimizde erekshe bilim berý qajettilikteri bar balalardy qoldaýǵa arnalǵan ınfraqurylym belsendi damyp keledi. Búginde 516 arnaıy uıym jumys isteıdi. Memleket basshysynyń tapsyrmasyna sáıkes aýtızm ortalyqtarynyń jelisi keńeıtilip jatyr, sondaı-aq erte jastan bastap mamandyq alýǵa deıingi balalardy keshendi súıemeldeý tujyrymdamasy bekitildi.

Aıta keteıik, ınklıýzıvti bilim berý úshin jaǵdaı jasalǵan bilim berý uıymdarynyń úlesi 93,3%-dy quraıdy. Al arnaıy psıhologııalyq-pedagogıkalyq qoldaýmen qamtylǵan balalar sany 87%-ǵa jetti.

Aıta ketelik elimizde ınklıýzıvti bilim berý jónindegi Dúnıejúzilik kongress ótetini týraly jazǵan edik.