Elde HAMAS ókilderi júrgeni úshin Netanıahý Qatarǵa qoqan-loqy kórsetti

ASTANA.KAZINFORM - Izraıldiń Dohaǵa shabýyly aımaqta shuǵyl konsýltatsııalar ótkizýge túrtki boldy, dep habarlaıdy Kazinform agenttiginiń menshikti tilshisi.

Izraıl premer-mınıstri Bınıamın Netanıahý sársenbi kúni Dohadaǵy HAMAS basshylaryna áýeden jasalǵan shabýyldan keıin qatań málimdeme jasap, Qatar HAMAS basshylyǵyn qýyp jiberýi kerek nemese sotqa berýi kerek dedi.

Aǵylshyn tilindegi úndeýinde Netanıahý Izraıl áreketin 2001 jylǵy 11 qyrkúıektegi shabýyldardan keıingi amerıkalyq operatsııamen salystyrdy.

- Bizdiń de ózimizdiń 11 qyrkúıegimiz bar. 7 qazanda ıslam lańkesteri evreı halqyna Holokosttan keıingi eń aýyr zulymdyq jasaǵany esimizde, - dedi ol.

Prime Minister Benjamin Netanyahu:
“Tomorrow is September 11th. We remember September 11th. On that day, Islamist terrorists committed the worst savagery on American soil since the founding of the United States. pic.twitter.com/KDZcTXRsK0

— Prime Minister of Israel (@IsraeliPM) September 10, 2025

Izraıl premer-mınıstri Qatardyń HAMAS-qa baspana jáne qarjy bóletinin basa aıtty.

— Biz Aýǵanstandaǵy ál-Qaıda lańkesterin joıyp, Pákistanda Ýsama ben Ladendi joıǵan Amerıka sııaqty áreketke bardyq, — dedi Netanıahý halyqaralyq qaýymdastyqtyń kózqarasynyń ala-qulalyǵyn aıyptap.

Qatardyń Syrtqy ister mınıstrligi onyń sózin aıyptap, Qatar aýmaǵyna shabýylyn óziniń orynsyz áreketin aqtap alýǵa umtylǵan «qorqaýdyń áreketi», sondaı-aq memlekettiń egemendigine qatysty zańsyz áreket ári tikeleı qaýip dep atady.

Doha HAMAS keńsesiniń AQSh jáne Izraılmen kelisilgen araǵaıyndyq mıssııasy aıasynda jumys istep jatqanyn qos ketti.

Qatar premer-mınıstri sheıh Muhammed ben Abdýlrahman Ál Tanı CNN telearnasyna bergen suhbatynda oqıǵany «memlekettik terrorızm» dep atady.

- Bul áreketke degen ashýymdy jetkizýge sózim jetpeıdi. Bizge opasyzdyq jasaldy. Netanıahý jaýapqa tartylýy kerek, - dedi ol.

Onyń aıtýynsha, soqqy ızraıldik kepilge alynǵan otbasylardyń beıbit kelissózderdiń sátti ótýine degen úmitin sóndirdi.

Ol Izraıl soqqysy Qatar sheneýnikterin aýyr jaǵdaıda qaldyrǵanyn, Parsy shyǵanaǵy aımaǵyna qaýip tónip turǵanyn eskertti.

Netanıahýdyń qoqan-loqqylary AQSh prezıdenti Donald Tramptyń seısenbide «Qatar jerine budan bylaı shabýyl jasalmaıdy» degen málimdemesine qaramastan jasaldy.

Wall Street Journal gazeti Aq úıdiń joǵary laýazymdy tulǵalaryna silteme jasap, AQSh prezıdenti Donald Tramp seısenbi kúni Netanıahýdyń Qatardaǵy HAMAS uıymyna shabýyl jasaý sheshimin «aqylsyz» dep aıtqanyn jetkizdi.

Lıvannyń «Ál-Ahbar» gazeti mysyrlyq derekkózderge silteme jasap, Izraıldiń HAMAS jetekshileri turatyn Túrkııa aýdandarynda osyndaı operatsııa ótkizýden bas tartqannan keıin, Qatardaǵy HAMAS shtab-páterine soqqy bergenin habarlady.

Gazet derekkózderiniń habarlaýynsha, Netanıahý úkimeti Tramp ákimshiliginiń Qatarmen bul máseleni sheshe alatynyna senip, Qatarda áreket etýge sheshim qabyldaǵan.

Dohadaǵy oqıǵalar joǵary deńgeıli shuǵyl qońyraýlar tolqynyn týdyrdy.

BAÁ prezıdenti sheıh Muhamed ben Zaed ál-Nahaııan qazirdiń ózinde shuǵyl konsýltatsııalar úshin Qatarǵa keldi jáne alda Iordanııa koroli men Saýd Arabııasy taq murageriniń sapary kútilýde. Jaqyn kúnderi Dohada ujymdyq jaýap ázirleý úshin arab-ıslam sammıtin ótkizý josparlandy.

Osyǵan deıin Qatardyń Dohadaǵy shabýyldan keıin Gaza boıynsha kelissózdi toqtatqany týraly jazdyq.