Elde halyqtyń kommýnaldyq qyzmetter boıynsha bereshegi 19 mlrd teńge boldy
ASTANA. KAZINFORM – Kommýnaldyq qyzmetter boıynsha debıtorlyq bereshektiń joǵary somasy Almaty qalasynda qalyptasqan. Bul týraly Úkimet otyrysynda Ónerkásip jáne qurylys mınıstri Ersaıyn Naǵaspaev málim etti.
- Mınıstrlik tarapynan avtonomdy qazandyqtardyń daıyndyǵyna monıtorıng júrgizilip jatyr. Jergilikti atqarýshy organdardyń málimetine sáıkes, búginde 14 618 avtonomdy qazandyq daıyndaldy, bul 98%. 6 óńirde nysandardyń daıyndyǵy 100%-ǵa jetti. Tómen kórsetkish Almaty men Shymkent qalalarynda. Avtonomdy qazandyqtarǵa arnalǵan kómir daıyndyǵy 69%-dy qurady, mazýt qory 88 paıyz, al dızel otyny 93 paıyz deńgeıinde daıyndaldy, - dedi E.Naǵaspaev.
Sonymen qatar ol tutynýshylardyń bereshegi bar ekenin atap ótti.
- Búginde zańdy jáne jeke tulǵalardyń kommýnaldyq qyzmetter boıynsha debıtorlyq bereshegi shamamen 19 mıllıard teńge boldy. Eń joǵary bereshek Almaty qalasynda qalyptasqan. Debıtorlyq bereshektiń joǵary bolýy tabıǵı monopolııalar sýbektilerine bekitilgen ınvestıtsııa baǵdarlamasyn tolyq iske asyrýǵa múmkindik bermeıdi, - dedi mınıstr.
Aıta keteıik, ortalyq, soltústik, shyǵys óńirler men Astanada on besinshi qyrkúıekke deıin, al qalǵan óńirlerde 15 qazanǵa deıin jylytý maýsymyna tolyq daıyndyqty qamtamasyz etý qajet.
Buǵan deıin habarlanǵandaı, jańa jylý berý maýsymyna daıyndyq jumystary bastalǵannan beri (2026 jyldyń 1 mamyrynan 17 tamyzǵa deıin) respýblıka boıynsha temirjol kóligimen 19 mln tonna kómir tasymaldandy.
