Elde halyqaralyq reısterge qyzmet kórsetetin áýejaılarǵa qoıylatyn talaptar jańardy
ASTANA. KAZINFORM – Qazaqstanda halyqaralyq reısterge qyzmet kórsetetin áýejaılardy ashý jáne paıdalaný erejeleri jańartyldy.
Tıisti buıryqqa kólik mınıstriniń mindetin atqarýshy qol qoıǵan. Qujat bıylǵy 10 mamyrdan bastap kúshine enedi.
Qujat 2011 jyldan beri qoldanysta bolǵan erejelerge ózgerister engizip, áýejaılardyń ınfraqurylymy men jabdyqtalýyna qoıylatyn talaptardy naqtylaıdy.
Endi erejede «halyqaralyq áýejaı» uǵymy bekitildi — bul kedendik, shekaralyq jáne sanıtarlyq-karantındik baqylaý uıymdastyrylǵan áýe aılaǵy.
Sondaı-aq halyqaralyq reısterge ashylatyn áýejaılarǵa qoıylatyn talaptar jańartyldy. Atap aıtqanda, olarda:
— aerodromnyń jaramdylyǵy týraly qoldanystaǵy sertıfıkat jáne sheteldik áýe kompanııalaryna qyzmet kórsetetin personal;
— kedendik baqylaýdan ótýge arnalǵan qos dáliz júıesi («qyzyl» jáne «jasyl») bar aerovokzal;
— «ushý» jáne «qoný» aımaqtary, sondaı-aq deklaratsııa rásimdeýge arnalǵan bólmeler;
— keminde eki tekserý orny men pasporttyq baqylaý kabınalary;
— tyıym salynǵan zattar men zattekterdi anyqtaıtyn jabdyqtar bolýy tıis.
Іri avıatsııalyq habtar úshin qosymsha talaptar qarastyrylǵan. Olardyń qatarynda tranzıttik jolaýshylarǵa arnalǵan orynjaılar, júk pen bagaj qoımalary, deportatsııalanǵan jáne ustalǵan adamdarǵa arnalǵan oqshaýlaǵyshtar, sondaı-aq shekara, keden jáne ózge de qyzmetterdiń jumys kabınetteri bolýy qajet.
Qujatta áýejaıdaǵy barlyq qyzmetterdiń ózara is-qımyl tártibi, jolaýshylardy tasymaldaýǵa arnalǵan kólik quraldarynyń bolýy jáne sanıtarlyq baqylaýǵa jaǵdaı jasaý talaptary da kórsetilgen.
Buǵan deıin Astana áýejaıynda jańǵyrtý jumystary júrgiziletini týraly jazǵan edik.
