Halyqaralyq esirtki jelisi toqtatyldy: 24 adam ustalyp, mıllıardtaǵan qarjy tárkilendi
ASTANA. KAZINFORM — Bas prokýror Berik Asylov arnaıy prokýrorlar tergeýdi aıaqtap, esirtkiniń onlaın aınalymyna qarsy kúreske qatysty birqatar iri isti sotqa jibergenin aıtty.
— Arnaıy prokýrorlar ınternettegi esirtki bıznesine qarsy kúres boıynsha birqatar iri isti tergep-tekserýdi aıaqtap, sotqa jiberdi.
Shymkentte Telegram messendjeri arqyly jumys isteıtin halyqaralyq esirtki jelisiniń joly kesildi. Tergep-tekserý basqa quqyq qorǵaý jáne arnaıy organdarmen birlesip júrgizildi. Prokýratýranyń bastamasymen qazaqstandyq jedel-tergeý tobyna halyqaralyq deńgeıde osy jumysta tájirıbesi bar AQSh-tyń esirtki bıznesine qarsy kúres vedomstvosynyń (DEA) qyzmetkerleri qatysty, — dedi Berik Asylov.
Qylmystyq shemaǵa 300-den astam adam qatysqan.
— Tek eki aıyptalýshynyń tranzaktsııalary boıynsha aınalym 7 mıllıon AQSh dollarynan asqany belgili boldy. 24 adam ustaldy, olardyń arasynda Reseı, Ózbekstan jáne Aýǵanstan azamattary bar. 500 mıllıon teńgeden astam múlik tárkilendi. Aqsha «dropperlerdiń» bank kartalary jáne lıtsenzııalanbaǵan krıptobırjalary arqyly aýdarylyp otyrǵan. Krıptovalıýtalardy shet elderdiń azamattary alyp otyrǵan. Sondaı-aq tergeý barysynda Shymkent aýmaǵynan eki esirtki zerthanasy tabylyp, joıyldy, — dedi ol.
Olardan:
— 6,1 kg daıyn mefedron;
— 330 gramm satýǵa arnalǵan oralǵan esirtki;
— 2,1 tonna prekýrsor;
— esirtki óndirýdi qamtamasyz etip otyrǵan zerthanalyq jabdyqtar jıyntyǵy alyndy.
— Qylmystyq jeli «Karbon», «DDD_Shym» jáne basqa Telegram arnalaryn paıdalanǵan, olar arqyly esirtki taratylyp qana qoımaı, sonymen qatar «alǵashqy qoldanýshylarǵa» olardy óndirý ádisterin úıretken. Keıbireýler prekýrsorlardy jetkizetin jáne aınalymdy baqylaıtyn negizgi jelimen baılanysyn saqtaı otyryp, óz arnalaryn ashty. Osyndaı tásilder elimizdiń basqa óńirlerinde tergep-tekserýde qoldanyldy. Ulytaý men Mańǵystaý oblysynyń arnaıy prokýrorlary bastaǵan jedel-tergeý toptary sıntetıkalyq esirtki satýǵa áleýmettik jelilerdi paıdalanatyn esirtki satýshylardyń eki taralǵan jelisiniń qyzmetin áshkereledi. Eki is te sotqa jiberildi, — dedi bas prokýror.
Osylaısha, Ulytaý oblysynda «Kaef Mafia» Telegram arnasy arqyly esirtki satqan dúkenniń jumysy toqtatyldy.
— 6 aıyptalýshy qamaýǵa alyndy, tsıfrlyq aktıvterdi, krıptovalıýta ámııandaryn jáne basqa da qundylyqtardy qosqanda 3,2 mıllıardtan astam teńge memleketke qaıtaryldy. Mańǵystaýda «Dune-Operator 24/7» esirtki dúkeniniń áreketteriniń joly kesildi. Esirtki satýdan túsken qolma-qol aqshany bankke tapsyrý kezinde arnaıy prokýror oblystyń ETD jáne PD qyzmetkerlerimen birlesip, Shymkentke barǵan kezde 1 mıllıard 155 mıllıon teńge jáne 176 myń AQSh dollaryn tárkilegen. Sonymen qatar sot bir jeke kásipkerdiń banktik shotyna esirtki bıznesinen túsken 1 mıllıard teńgege jáne 734 228 AQSh dollary (USDT) bar krıptoámııanǵa tyıym saldy, — dedi Berik Asylov.
Aıta ketelik Astanada esirtki zerthanasy joıylyp, úsh qylmystyq top ustaldy.