Elde halyqaralyq deńgeıdegi 25 qonaq úı paıdalanýǵa beriledi
ASTANA. KAZINFORM — Qazaqstanda týrızm salasynda 1,3 trln teńgeni quraıtyn 328 ınvestıtsııalyq joba iske asyrylyp jatyr.
Bul týraly Úkimet otyrysynda QR Týrızm jáne sport mınıstri Erbol Myrzabosynov málim etti.
— Týrızm salasynyń turaqty damýy men básekege qabilettiligin arttyrýda ınvestıtsııalar tartý mańyzdy. Búginde bul baǵytta naqty nátıjelerge qol jetkizildi. Іske asyrylǵan ınvestıtsııalyq jobalardyń qatarynda Almaty oblysyndaǵy ınvestıtsııa kólemi 57 mlrd teńgeni quraıtyn «Oi-Qaragai» taý kýrorty, Qonaev qalasyndaǵy quny 11 mlrd teńge somadaǵy «ASP Arena» sporttyq-oıyn-saýyq kesheni, quny 2 mlrd teńge «PetroRetail PFS» kópfýnktsıonaldy jol boıy servıs nysany bar. Atalǵan nysandardyń paıdalanýǵa berilýi týrıstik ınfraqurylymdy nyǵaıtýǵa, servıstiń sapasyn arttyrýǵa jáne óńirlerdiń týrıstik áleýetin keńeıtýge yqpal etedi, — dedi E. Myrzabosynov.
Onyń aıtýynsha, qazirgi ýaqytta Qazaqstanda jalpy ınvestıtsııa kólemi shamamen 1,3 trln teńgeni quraıtyn 328 ınvestıtsııalyq joba iske asyrylyp jatyr. Bul jobalar shamamen 10 myń turaqty jumys ornyn qurýǵa múmkindik beredi. Sonymen qatar halyqaralyq deńgeıdegi
25 qonaq úı paıdalanýǵa beriledi.
— 2027 jyldyń sońyna deıin aıaqtalýy josparlanǵan iri jobalardyń qatarynda Shymkent qalasyndaǵy quny 17,5 mlrd teńge bolatyn «Hilton» qonaq úıi, Qonaev qalasyndaǵy quny 28 mlrd teńge bolatyn «Marriott» kesheni jáne quny 53,3 mlrd teńge bolatyn «Jibek joly» kýrorttyq-oıyn-saýyq kesheni bar, — dedi mınıstr.
Buǵan deıin týrızm salasynda 600 myńnan astam adam jumyspen qamtylǵanyn jazǵan edik.
