Elde ǵylymı jobalardy qarjylandyrý qandaı nátıje berdi
ASTANA. KAZINFORM — Ǵylym jáne joǵary bilim mınıstri Saıasat Nurbek ǵylymı-zertteý jáne tájirıbelik-konstrýktorlyq jumystardy qarjylandyrýǵa baǵyttalǵan bıýdjet teńgesine shaqqanda qandaı nátıje bolǵanyn aıtty.
Ǵylym jáne joǵary bilim mınıstrligi «Ǵylym qory» aktsıonerlik qoǵamy arqyly ǵylymı nemese ǵylymı-tehnıkalyq qyzmet nátıjelerin (ǴǴTQN) kommertsııalandyrý jobalaryn granttyq qarjylandyrý tetigin iske asyryp keledi. Atalǵan tetik ǵylymı ázirlemelerdi óndiriske engizýge jáne olardyń ekonomıkalyq qaıtarymyn arttyrýǵa baǵyttalǵan.
— Osy tetik aıasynda 386 joba qoldaý tapty, olardy iske asyrýǵa 90,8 mlrd teńge granttyq qarajat bólindi. Qazirgi ýaqytta 291 joba naryqta ónim ótkizýde, onyń ishinde 30 joba eksportqa shyqty. Qoldaý tapqan jobalardyń ǵylymı-tehnıkalyq damýǵa qosqan jıyntyq úlesi 147,1 mlrd teńgeni qurady, bul bólingen granttyq qarjylandyrý kóleminen 1,62 ese joǵary. Ónimdi ótkizýden túsken túsim 65,3 mlrd teńgege jetti, onyń ishinde eksporttyq túsim 1,6 mlrd teńge. Bıýdjetke 13,5 mlrd teńge salyq tólendi, 28,2 mlrd teńge jeke qarjylandyrý tartyldy, 40,1 mlrd teńgege negizgi quraldar satyp alyndy jáne shamamen 2,4 myń jumys orny quryldy, — delingen Saıasat Nurbektiń Quryltaı depýtatynyń saýalyna bergen jaýabynda.
Osylaısha, iske asyrylyp jatqan tetik jeke kapıtaldy tartýǵa, ónim óndirý men ótkizýdi ulǵaıtýǵa, salyq túsimderin qamtamasyz etýge jáne jumys oryndaryn qurýǵa múmkindik beredi.
— Qoldanbaly ǵylymı zertteýlerdiń praktıkalyq nátıjeliligin baǵalaý maqsatynda Qazaqstan Respýblıkasynda joǵary bilim men ǵylymdy damytýdyń tujyrymdamasynda «Aıaqtalǵan qoldanbaly ǵylymı-zertteý jumystarynyń jalpy sanyndaǵy kommertsııalandyrylatyn jobalardyń úlesi» nysanaly ındıkatory kózdelgen. 2023 jylǵa arnalǵan 28%, 2024 jylǵa arnalǵan 29% jáne 2025 jylǵa arnalǵan 35% josparly kórsetkishter kezinde naqty kórsetkishter tıisinshe 40,1%, 43,6% jáne 35,8%-dy qurady. 2026 jylǵa arnalǵan nysanaly ındıkatordyń naqty máni jyl qorytyndysy boıynsha aıqyndalady. Budan basqa, kommertsııalandyrý baǵdarlamasy aıasynda qoldaý tapqan 386 jobanyń 291-i naryqta ónim ótkizýde, al 30 joba eksportqa shyqty, — dedi mınıstr.
Aıta keteıik, Ǵylym qory 2016 jyldan bastap ǵylymı nemese ǵylymı-tehnıkalyq qyzmet nátıjelerin (ǴǴTQN) kommertsııalandyrý jobalaryn grant aıasynda qarjylandyrýǵa konkýrstar ótkizip keledi.
