Elde fýtbol matchtaryna eń kóp kórermen jınaıtyn qalalar ataldy

QFF málimetinshe, bıylǵy Qazaqstan Premer-lıgasynda óz alańyndaǵy matchtarǵa ortasha eseppen eń kóp kórermen jınaǵan komanda — «Aqtóbe». Aqtóbe qalasynda klýbtyń oıyndaryn orta eseppen 10 291 jankúıer tamashalaǵan. 2026 jyly komandanyń óz alańyndaǵy matchtaryna barlyǵy 113 200 kórermen kelgen. Al jergilikti stadıonnyń syıymdylyǵy — 12 621 adam.

Ortasha kórermen sany boıynsha ekinshi orynda «Qaısar» tur. 2026 jyly Qyzylordada 11 myń kórermenge arnalǵan jańa stadıon ashylǵan. Komandanyń matchtaryn orta eseppen 8 672 jankúıer tamashalaǵan. Osy maýsymda «Qaısardyń» óz alańyndaǵy oıyndaryna barlyǵy 112 736 kórermen kelgen.

Úzdik úshtikti «Astana» túıindedi. Syıymdylyǵy 30 myń adamǵa arnalǵan «Astana Arenaǵa» komandany qoldaýǵa orta eseppen 8 593 kórermen kelgen. Klýbtyń matchtaryna jalpy 94 520 jankúıer jınalǵan.

Jalpy kórermen sany boıynsha «Aqtóbe», «Qaısar» jáne «Astanadan» keıin Semeıdiń «Elimaıy» — 72 080 kórermen jáne elordanyń «Jeńisi» — 68 900 kórermen kórsetkishimen ornalasqan.

Bir qyzyǵy, eldiń qazirgi chempıony — almatylyq «Qaırattyń» QPL-degi matchtaryna orta eseppen 6 567 kórermen kelgen. 2026 jyly klýbtyń Premer-lıgadaǵy oıyndaryn barlyǵy 59 106 jankúıer tamashalaǵan. Bul rette Almatydaǵy Ortalyq stadıon 23 804 kórermenge arnalǵan.

Al «Qaırattyń» eýropalyq klýbtyq týrnırlerdegi irikteý kezeńindegi matchtary kórermenge toly bolǵan. Komandanyń óz alańyndaǵy eki oıynyna jalpy 47 608 jankúıer kelgen, ıaǵnı ár matchty orta eseppen 23 804 adam tamashalap, stadıon tolyqtaı lyq tolǵan.

«Astananyń» eýrokýbok irikteýindegi óz alańyndaǵy bir oıynyna 15 270 kórermen jınalǵan. Al «Elimaıdyń» Semeıdegi eýrokýbok matchy anshlagpen ótip, ony 8 445 jankúıer tamashalaǵan. «Tobyldyń» eýrokýboktaǵy matchyna 5 837 kórermen kelgen. Qostanaıdaǵy stadıonnyń syıymdylyǵy — 8 285 oryn.

Buǵan deıin Qazaqstan quramasynyń taǵy eki fýtbolshysy matchtarǵa qatysa almaıtynyn jazǵan bolatynbyz.