Elde fılologııalyq saraptama júrgizetin mamandar sany qansha
ASTANA. KAZINFORM – Qazaqstanda fılologııalyq saraptama júrgizetin mamandar tapshylyǵy baıqalady. Bul týraly Ortalyq kommýnıkatsııalar qyzmeti alańynda ótken brıfıngide QR Ádilet mınıstrligi Sot saraptamalary ortalyǵynyń dırektory Baqytjan Baıtılesov málim etti.
Onyń aıtýynsha, búginde elde 1 200-den astam sot sarapshysy jumys isteıdi. Alaıda olardyń tek 28-i ǵana fılologııalyq saraptama júrgizýge mamandanǵan.
– Qazirgi tańda 28 sarapshy qazaq jáne orys tilderinde fılologııalyq saraptama júrgizedi. Onyń 14-i qazaq tilinde, qalǵan 14-i orys tilinde jumys isteıdi, - dedi Baqytjan Baıtılesov.
Spıkerdiń málimetinshe, 2025 jylǵy statıstıka boıynsha shamamen 2 200 fılologııalyq saraptama júrgizilgen. Onyń 60 paıyzy qazaq tilinde, al 40 paıyzy orys tilinde ótkizilgen.
Aıta keteıik, Qazaqstanda sot saraptamasyna arnalǵan arnaıy úı-jaılar men saraptamalardy júrgizý qaǵıdalaryna ózgerister men tolyqtyrýlar engizildi.
