Elde eýropalyq ımmýndaý aptalyǵy ótkizilmek
ASTANA. 21 sáýir. QazAqparat - Búginnen bastap 27 sáýirge deıin Qazaqstanda «Aldyn alý - Qorǵaý - Egý» uranymen eýropalyq ımmýndaý aptalyǵy ótkiziledi.
Aktsııa Dúnıejúzilik densaýlyq saqtaý uıymynyń (DDU) bastamasy boıynsha uıymdastyrylýda, dep habarlady QR Densaýlyq saqtaý mınıstrliginiń baspasóz qyzmetinen.
Jyl saıyn uıymdastyrylatyn aktsııanyń maqsaty - ımmýndaýdyń mańyzy jáne egýlermen tolyq qamtý týraly halyqty aqparattandyrý deńgeıin arttyrý úshin olardy úgitteý jáne úndeý bolyp tabylady.
Ulttyq profılaktıkalyq egýler kúntizbesine sáıkes Qazaqstanda 2 jasqa deıingi balalarǵa 11 ınfektsııalyq aýrýǵa qarsy vaktsınatsııalaý júrgiziledi. Bala barlyq egýlerdi alýy qajet, sebebi olardyń árqaısysy ártúrli ınfektsııalardan qorǵaıdy.
Halyqty ınfektsııalyq aýrýlardan qorǵaý maqsatynda «Halyq densaýlyǵy jáne densaýlyq saqtaý júıesi týraly» QR Kodeksine sáıkes Qazaqstan aýmaǵyndaǵy barlyq jeke tulǵalardyń egilý mindettiligi kózdelgen. Halyqqa ımmýndaý ótkizbeý ınfektsııaǵa sezimtal adamdar sanynyń kóbeıýine soqtyrady, sonyń saldarynan aýrýlar beleń alady.
Qazaqstanda 21 ınfektsııalyq aýrýǵa qarsy vaktsınatsııa júrgiziledi. Balalardy vaktsınatsııalaý úshin sapasyna kepildik berilgen vaktsına satyp alynady. Olardyń óndirisin DDU sertıfıkattaǵan. Vaktsınalardy shyǵarýǵa qatal talaptar qoıylady, vaktsına zııansyzdyǵyna, qaýipsizdigine, tıimdiligine qatysty zerthanalyq, klınıkalyq baqylaýdan ótedi.
Immýndaý aptalyǵy aıasynda barlyq óńirlerde belgilengen merzimderde ınfektsııalyq aýrýlarǵa qarsy egilmegen balalardy anyqtaý jáne olardy vaktsınatsııalaý boıynsha jumys júrgiziledi.
2012 jyly Qazaqstan aýmaǵyndaǵy Eýropalyq ımmýndaý aptalyǵynyń negizgi baǵyttary: halyqtyń ımmýndyq profılaktıkaǵa senimin qalyptastyrý, olarǵa ımmýndyq profılaktıkanyń qaýipsizdigi týraly aqparat berý, ınfektsııalyq aýrýlarǵa qarsy qorǵaýdyń qajettiligi týraly jáne qoǵam úshin ımmýndaýmen jetkiliksiz qamtýdyń saldarlary týraly halyqty, qoǵamdy jáne medıtsına qyzmetkerlerin aqparattandyrý, jergilikti atqarýshy organdarynyń nazaryn ımmýndyq profılaktıka máselelerine aýdarý bolyp tabylady.
Aktsııany ótkizý barysynda jergilikti jerlerde ımmýndaýdyń qaýipsizdigi jáne mańyzdylyǵy týraly úgitteý boıynsha baspasóz máslıhattary, dóńgelek ústelder uıymdastyrylady, turǵyndarmen, balalardyń mektepke deıingi uıymdarynda, mektepterde ata-analarmen kezdesýler ótkiziledi.
Eresek adamdarmen qatar balalar da ınfektsııanyń paıda bolý qaýpin, aýrý aǵymynyń aýyrlyǵyn jáne qaýipti asqynýlardyń damýyn tómendetetin qajetti egýlerdi ýaqytyly alýy qajet.
