Elde ettiń kúrt qymbattaýyna negiz joq — mınıstrlik
ASTANA. KAZINFORM — Qazaqstanda sıyr etiniń ortasha baǵasy kelisine 3 800 teńge shamasynda satylyp jatyr. Aýyl sharýashylyǵy mınıstrligi elde et baǵasyn kúrt ósiretin faktor joq dep esepteıdi.
Aýyl sharýashylyǵy vıtse-mınıstri Nazgúl Hatepovanyń aıtýynsha, mınıstrlik et baǵasyna kún saıyn monıtorıng júrgizedi. Astanadaǵy saýda oryndarynda baǵa ártúrli qalyptasqan.
— Mysaly, Shapaǵat bazarynda sıyr etiniń baǵasy shamamen 3 500 teńge bolsa, Artemde 4 400-4 500 teńge kóleminde. Jalpy respýblıka boıynsha sıyr etiniń ortasha baǵasy — kelisine 3 800 teńge, — dedi N. Hatepova Úkimet úıinde ótken brıfıngte.
Vıtse-mınıstr eldegi ishki naryqtyń sıyr etimen tolyq qamtamasyz etilip otyrǵanyn atap ótti.
— Ótken jyldyń qorytyndysy boıynsha 434 myń tonna sıyr eti óndirildi. Bıyl da alǵashqy 8 aıda óndiris kóleminiń óskenin kórip otyrmyz. Mal basy da artyp keledi. Sondyqtan sıyr etiniń baǵasy kúrt ósedi dep boljaýǵa esh negiz joq, — dedi mınıstrlik ókili.
Buǵan deıin Nazgúl Hatepova eldegi kartop egý alqaby 5,5 myń gektarǵa kóbeıgenin, olardy saqtaıtyn qoımalar da jetkilikti ekenin aıtqan edi.
Kólik vıtse-mınıstri Jánibek Taıjanov Qazaqstan astyǵy qaı elderge kóbirek eksporttalatynyn baıandady.
