Elde et pen nan qymbattaýy múmkin - Dosaev
NUR-SULTAN. QazAqparat – Ulttyq bank tóraǵasy Erbolat Dosaev Qazaqstanda aldaǵy ýaqytta et pen nannyń qymbattaýyna ne sebep bolatynyn aıtyp ótti, dep habarlaıdy QazAqparat tilshisi.
«Qarashada jyldyq ınflıatsııa bizdiń kútkenimizden tómen qalyptasyp, 5,4 paıyzdyq kórsetkishte boldy. Mundaǵy ósimdi azyq-túlik taýarlary qosyp otyr. Olar bir jylda 9,7 paıyzǵa qymbattady. Nan-toqash ónimderi men jarma baǵasynyń 15,5 paıyzǵa, et jáne et ónimderiniń 13,4 paıyzǵa, balyq pen teńiz ónimderiniń 12,2 paıyzǵa ósýi erekshe baıqalady», - dedi Dosaev búgingi Úkimet otyrysynda.
UB tóraǵasynyń aıtýynsha, halyq kirisiniń ulǵaıýy aıasynda ishki suranystaǵy ósim men fıskaldyq yntalandyrýdyń saqtalýy – ınflıatsııa ósiminiń negizgi táýekelderi bolyp otyr.
«Qysqa merzimdi kezeńde azyq-túliktiń keıbir túrleri, atap aıtqanda, dándi-daqyldardyń, sondaı-aq EAEO sheńberinde jańa talaptardyń engizilýi aıasynda sút óniminiń qymbattaýyna baılanysty et pen nan qymbattaýy múmkin», - dedi ol.
