Elde et baǵasy qansha teńge bolýy kerek — mınıstr jaýaby

ASTANA. KAZINFORM — Aýyl sharýashylyǵy mınıstri Aıdarbek Saparov eksport pen ishki naryqtaǵy et baǵalaryn salystyryp, ádil baǵasy qansha teńge bolýy keregin aıtty. 

— Fermerler mal sharýashylyǵyn jyldam ári joǵary qarqynmen damytýdy josparlaıdy. Árıne, olar baǵanyń joǵary bolǵanyn qalaıdy, ıaǵnı eksporttyq baǵa 10-12 myń teńge aralyǵynda bolý keregin aıtyp júr. Qazirgi ýaqytta eksporttyq baǵa ettiń sanatyna baılanysty 4,5 myńnan 6 myń teńgege deıin jetedi. Ettiń qońdylyǵyna, sapasyna qaraı baǵa ózgerip otyrady, — dep jaýap berdi mınıstr Úkimettegi brıfıngte.

Onyń aıtýynsha, qazir ishki naryqtaǵy tiri maldyń eti kelisine 1600-1800 teńge bolyp otyr.

— Tipti arzandady deýge bolady, bir kezde bul baǵa 2000 teńgege deıin jetken bolsa, qazir orta eseppen 1700 teńgege aınalady. Eger 1700 teńgeni etke shaqqanda eseptesek, ishki naryqtaǵy kóterme baǵa shamamen 3000-4000 teńge bolady, — dedi mınıstr.

Buǵan deıin Aıdarbek Saparov sıyr eti kartop retinde eksporttaldy degen aqparatty teriske shyǵardy.