Elde estý qabileti buzylǵan balalar qandaı qıyndyqqa tap boldy

ASTANA. KAZINFORM – Quryltaı depýtaty Ekaterına Smolıakova estý qabileti buzylǵan balalardy qoldaý júıesin jetildirý jóninde depýtattyq saýal joldady.

Dýdýqlangan avlod: logopedııa - bıznesmı ekı erdam
Foto: Kazinform / JI

- Búginde ınklıýzıvti bilim berý júıesine memleket tarapynan aýqymdy qoldaý kórsetilip jatyr. Degenmen de, óńirlerden jınaqtalǵan málimetter birqatar máseleniń ózektiligin kórsetti. Bul – elimizdegi estý jáne sóıleý qabiletinen aıyrylǵan myńdaǵan balanyń «únsiz» álemi. Olardyń da aıtary bar. Birinshi másele – kohlearlyq ımplantatsııadan keıingi ońaltý. Elimizde estý qabileti buzylǵan 5 myń balanyń 1200-den astamyna kohlearlyq ımplantatsııa jasalǵan. Úkimet bala saýyǵyp ketsin dep bir otaǵa bıýdjetten 15 mln teńge shamasynda jumsaıdy. Biraq ol nátıjeli bolý úshin uzaq merzimdi ońaltý qajet. Áleýmettik qyzmetter aıasynda balalar aptasyna nebári 15 mınýt defektolog pen 35 mınýt logopedtiń kómegin alady. Bul óz kezeginde jetkiliksiz. Mysaly, Qyzylorda oblysynda ımplanty bar 185 balaǵa jylyna tek 30 ońaltý orny ǵana qarastyrylsa, Qaraǵandy oblysynda bul qyzmetti uıymdastyrý tek 2027 jylǵa josparlanǵan, - dedi Ekaterına Smolıakova Quryltaıdyń jalpy otyrysynda.

Onyń aıtýynsha, ym-ıshara tilin oqytý jáne psıhologııalyq qoldaý júıelenbegen.

- Taǵy bir másele – qazaq tilindegi daktıl jáne qazaq ym-ıshara tili álipbıin ázirlep, bekitý. Sondaı-aq, nashar estıtin balalarǵa arnalǵan oqýlyqtar, oqý-ádistemelik quraldar ázirlep, oqytýdyń biryńǵaı ádistemelik talaptaryn qalyptastyrý qajet. Sonymen qatar elimizde 4 myńǵa jýyq arnaıy pedagog jetispeıdi. Sońǵy bes jylda nebári 295 sýrdopedagog daıarlanǵan, qazir «Sýrdopedagogıka» mamandyǵynda 200-ge jýyq stýdent oqyp jatyr. Eńbekaqy, kásibı qoldaý jáne jastardy mamandyqqa tartý máseleleri sheshilmese, kadr tapshylyǵynyń sheshilmesi anyq, - dedi depýtat.

Osy oraıda ol kohlearlyq ımplantatsııadan keıingi úzdiksiz ońaltý júıesin qalyptastyrýdy surady. .

- Barlyq óńirde ata-analarǵa ym tilin úıretý jáne psıhologııalyq qoldaý kórsetý júıesin engizý mańyzdy. Qazaq tilindegi daktıl jáne qazaq ym tiliniń álipbıin ázirleý, ony resmı bekitý qajet. Munymen qosa, arnaıy pedagogter tapshylyǵyn qysqartýdyń naqty josparyn qabyldaý kerek, - dedi E. Smolıakova.

Aıta keteıik, Qazaqstanda ym-ıshara tili alǵash ret tolyq tsıfrlandyrylǵany málim boldy.