Elde esirtki bıznesine qarsy kúreske arnalǵan jańa keshendi jospar qabyldandy
ASTANA. KAZINFORM – Qazaqstanda Nashaqorlyq pen esirtki bıznesine qarsy kúresti kúsheıtý maqsatynda 2026–2028 jyldarǵa arnalǵan keshendi jospar bekitildi.
ІІM málimetinshe qujat aldyn alý sharalaryn keńeıtýge, esirtki qylmystaryn anyqtaýǵa jáne zamanaýı tsıfrlyq tehnologııalardy qoldanýǵa baǵyttalǵan.
2026–2028 jyldarǵa arnalǵan nashaqorlyq pen esirtki bıznesine qarsy kúres jónindegi keshendi jospar — qoǵamdaǵy esirtkige táýeldilikti joıýǵa, jastardy qorǵaýǵa, esirtki zattarynyń qoljetimdiligin shekteýge, sondaı-aq uıymdasqan esirtki aınalymynyń jolyn kesýge baǵyttalǵan vedomstvoaralyq júıeli qujat.
Memleket basshysynyń bıylǵy jyldyń naýryz aıynda ótken Ulttyq quryltaıdyń IV otyrysynda bergen tapsyrmalaryn oryndaý maqsatynda Іshki ister mınıstrligi memlekettik jáne jergilikti atqarýshy organdarmen birlesip, Qazaqstan Respýblıkasynda 2026–2028 jyldarǵa arnalǵan nashaqorlyq pen esirtki bıznesine qarsy kúres jónindegi keshendi jospardy ázirlep, bekitti.
Qujat ǵalamdyq jáne óńirlik deńgeıdegi esirtki ahýalyna qatysty negizgi úrdisterdi taldaý, Parlament depýtattary men memlekettik organdardyń usynystary, sondaı-aq júıeli vedomstvoaralyq ózara is-qımyl nátıjeleri negizinde ázirlendi.
Keshendi jospar memlekettik nashaqorlyq pen esirtki bıznesine qarsy saıasattyń negizgi baǵyttaryn qamtıdy. Atap aıtqanda, esirtki ahýalyn monıtorıngileý, aldyn alý sharalaryn kúsheıtý, esirtkige qatysty qylmystardyń jolyn kesý, zańnamany jetildirý, tsıfrlyq sheshimderdi engizý jáne halyqaralyq yntymaqtastyqty damytý kózdelgen.
Qujatta zamanaýı tehnologııalardy qoldanýǵa erekshe basymdyq berilgen.
Atap aıtqanda, taldamalyq jáne jedel qyzmetke jasandy ıntellektini engizý, gaztaldaǵyshtarmen jáne beınekameralarmen jabdyqtalǵan ushqyshsyz ushý apparattaryn satyp alý, ishki ister jáne ulttyq qaýipsizdik organdaryn jeke hımııalyq qorǵanys pen zalalsyzdandyrý quraldarymen jaraqtandyrý, zattaı dáleldemelerdi saqtaý qoımalaryn tsıfrlandyrý, sondaı-aq tsıfrlyq izder bazasyn qalyptastyrý kózdelgen.
Іs-sharalardyń jeke blogy zańnamalyq jáne normatıvtik quqyqtyq bazany jetildirýge baǵyttalǵan. Atap aıtqanda, esirtkige skrınıng júrgizýdiń negizderi men tártibin bekitý, parallel qarjylyq tergep-tekserýlerdi júrgizý, krıptovalıýta aınalymyn retteý, sıntetıkalyq esirtkige qarsy is-qımyl, sondaı-aq esirtki qylmystaryn anyqtaýǵa járdemdesken azamattardy yntalandyrý josparlanǵan.
Baǵdarlamalyq qujat 7 bólimnen, 106 tarmaq pen 30 tarmaqshadan turady.
Keshendi jospardy ázirleý barysynda ol Premer-mınıstr janyndaǵy Respýblıkalyq shtabtyń, Prezıdent janyndaǵy Jastar saıasaty jónindegi keńestiń, Іshki ister mınıstrligi janyndaǵy Nashaqorlyq quqyq buzýshylyqtardyń aldyn alý jónindegi keńestiń otyrystarynda, sondaı-aq halyqaralyq beıindi uıymdardyń saraptamalyq áleýetin paıdalana otyryp qaraldy.
Keshendi jospardy iske asyrý qoǵamdaǵy nashaqorlyqty jáne jasóspirimder arasyndaǵy esirtkige qatysty qylmystardy azaıtýǵa, esirtki men ınternettegi zańsyz kontentke qoljetimdilikti joıýǵa múmkindik beredi. Sondaı-aq esirtki arnalary men uıymdasqan qylmystyq toptardy áshkereleý kórsetkishteri artyp, óńir ákimdikteriniń esirtkige qarsy jumysynyń tıimdiligi arnaıy reıtıng arqyly baǵalanady.
Іs-sharalardy qarjylandyrý úsh jyldyq kezeńge respýblıkalyq jáne jergilikti bıýdjetter qarajaty esebinen kózdelgen.
Eske salaıyq, 2023-2025 jyldarǵa arnalǵan qoldanystaǵy keshendi jospardy iske asyrýdyń ózi naqty nátıjeler berdi.
Atap aıtqanda, esirtki zattary men prekýrsorlardyń tizbesi jańartylyp, oǵan 31 jańa ataý engizildi. Sıntetıkalyq esirtkini tárkileý kólemi 382 keliden 1,2 tonnaǵa jetti. Sot-saraptama organdary 41 zamanaýı qural-jabdyqpen qamtamasyz etilip, saraptama júrgizý merzimi bir aıdan bir táýlikke deıin qysqartyldy. Sonymen qatar «Kıberqadaǵalaý» aqparattyq júıesiniń kómegimen esirtkige qatysty saıttar men zańsyz kontentti buǵattaý kórsetkishi 2,6 myńnan 9,2 myńǵa deıin artqan.
Aıta ketelik Almatyda iri kólemde esirtki tasymaldaǵan top ustalǵan edi.