Elde eskirgen qansha lıfti bar

ASTANA. KAZINFORM — El boıynsha jalpy turǵyn úılerde ornalasqan qansha lıfti bar? Lıftilerdi aýystyrý qarqyny qalaı? Bul suraqqa Ónerkásip jáne qurylys mınıstrligi jaýap berdi.

- Qazirgi kezde eldiń turǵyn úı qorynda 33 858 lıft jabdyǵy bar. Onyń ishinde 4 144 lıft 25 jyldan astam paıdalanylyp keledi, al 3 195 lıft tehnıkalyq qyzmet kórsetý aıasynda kúrdeli jóndeý júrgizýdi talap etedi. 2019 jyldan bastap jergilikti bıýdjet qarajaty esebinen 1728 lıft aýystyryldy. 2024 jyly respýblıkalyq bıýdjet qarajaty esebinen 234 kóppáterli turǵyn úıge kúrdeli jóndeý jasalyp, onyń ishinde 8 lıfti aýystyryldy, - delingen mınıstrliktiń Kazinform agenttigine bergen jaýabynda.

«Turǵyn úı qatynastary týraly» Zańyna sáıkes, lıft kondomınıým obektisiniń ortaq múlkiniń quramdas bóligi. Osyǵan baılanysty lıft jabdyqtaryn aýystyrý jáne jóndeýge qatysty máselelerdi páter ıeleri jalpy jınalysta jalpy sanynyń keminde 51% kópshilik daýyspen sheshedi.

- 2025 jyly jergilikti atqarýshy organdardan 363 kóppáterli turǵyn úıdi kúrdeli jóndeý júrgizýge, sonyń ishinde 248 lıft jabdyǵyn aýystyrýǵa bıýdjettik ótinim berildi. Alaıda Respýblıkalyq bıýdjettiń lımıtine oraı, bıylǵa arnalǵan qarjylandyrýdy ýákiletti organ qoldamady. Biraq bul ótinimder 3 jyldyq bıýdjet boıynsha 2026 jylǵa qarastyrylady. Jospar boıynsha 2025 jylǵa – 524 lıft, 2026 jylǵa – 312 lıft, 2027 jylǵa 398 lıft aýystyrylyp, jóndeýden ótýi qajet, - dep atalyp ótken vedomstvo aqparatynda.

Eske salsaq, bıyl tamyz aıynda elordada ishinde bala bolǵan lıft úzilip ketti. 

Aıta keteıik, el aýmaǵynda lıftiniń kenetten isten shyǵý faktileri jıi bolyp turady. Bıyl mamyrda Qyzylordada lıft ishinde qalyp qoıǵan adamdar qutqaryldy.