Elde epıdemıologııalyq jaǵdaı turaqtaldy

ASTANA. KAZINFORM — 2026 jylǵy epıdemıologııalyq maýsym bastalǵaly beri elde jedel respıratorlyq vırýstyq ınfektsııalarmen (JRVI) syrqattanýshylyq ótken jyldyń osy kezeńimen salystyrǵanda 13%-ǵa tómendedi. Bul týraly Ortalyq kommýnıkatsııalar qyzmetinde ótken baspasóz konferentsııasynda DSM Sanıtarııalyq-epıdemıologııalyq baqylaý komıtetiniń tóraıymy Sarhat Beısenova habarlady. 

Onyń aıtýynsha, elde jyl saıyn qyrkúıek pen sáýir aralyǵynda 4–5 mıllıon JRVI jáne 2 myńǵa deıin tumaý jaǵdaıy tirkeledi.

— Bıyl tumaýdyń 3 027 zerthanalyq rastalǵan jaǵdaıy anyqtaldy. Onyń ishinde A (H3N2) — 2 967, A (H1N1) — 53, V tıpi — 7 jaǵdaı. Tumaýǵa qarsy 2,2 mıllıonnan astam adam egildi, bul halyqtyń 11%-yn quraıdy, — dedi Sarhat Beısenova.

Komıtet tóraıymy qarasha aıynda JRVI shekti deńgeıden asyp, jaǵdaı kúrdelengenin atap ótti.

Jalpy respýblıka boıynsha aýrý órship turǵan kezde 13 óńirde 11 812 synyp qashyqtan oqytý formatyna aýystyryldy, 18 193 synypta kabınettik júıe alynyp tastaldy jáne oqýshylardyń synyptar arasyndaǵy júrip-turýyn azaıtý maqsatynda belgilengen kabınetterde ǵana oqytý uıymdastyryldy, bul mektepterdegi epıdemıologııalyq jaǵdaıdy turaqtandyrýǵa múmkindik berdi.

— Qazir respýblıka boıynsha jalpy bilim beretin uıymdarda oqý protsesi shtattyq rejımde júrgizilip jatyr, bul mektepterdegi epıdemıologııalyq jaǵdaıdy turaqtandyrýǵa múmkindik berdi, — dedi komıtet tóraıymy.

Sarhat Beısenova turǵyndardy aldyn alý sharalaryn saqtaýǵa shaqyrdy.

— Qol gıgıenasyn saqtaý, kópshilik júretin jerde qaýipsiz qashyqtyqty ustaný jáne qajet bolǵan jaǵdaıda maska taǵý ınfektsııany juqtyrý qaýpin tómendetedi, — dedi ol.

Aıta keteıik, osyǵan deıin qyzylshamen aýyrǵandardyń 78%-y ekpe almaǵany týraly jazdyq.