Elde eńbekke qabiletti jastaǵy 4,5 mln astam áıel bar

ASTANA. QazAqparat – Elde eńbekke qabiletti jastaǵy 4,5 mln astam áıel bar. Bul týraly Eńbek jáne halyqty áleýmettik qorǵaý mınıstri Tamara Dúısenova QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń kezekti otyrysynda aıtty, dep habarlaıdy QazAqparat.

Mınıstrdiń aıtýynsha, elde eńbekke qabiletti jastaǵy áıelder sany – 4,5 mln astam, onyń 75%-y ekonomıkanyń túrli salalarynda eńbek etedi.

«Áıelder arasyndaǵy jumyssyzdyqtyń joǵary úlesin, eńbekke qabiletti jastaǵy áıelderdiń joǵary úlesin jáne 2000 jyldary týǵandar esebinen olardyń sanyn kóbeıtý yqtımaldyǵyn eskere otyryp, áıelderdi jumysqa ornalastyrý máselesi erekshe nazar aýdarýdy qajet etedi. Osyǵan baılanysty óńirlik jumyspen qamtý kartalary sheńberinde 947 myńnan astam adamdy, onyń ishinde áıelderdi jumysqa ornalastyrýmen qamtamasyz etý josparlanyp otyr. Búgingi tańda 267 myńǵa jýyq adam jumysqa ornalastyryldy, onyń 60,5%-y nemese 161,4 myńy – áıel», - dedi Tamara Dúısenova.

Jumyssyz áıelderdiń sanattaryn aıqyndaýda Otbasynyń tsıfrlyq kartasy baǵdar bolady. OTsK derekteri boıynsha jumysqa ornalastyrylǵan áıelderdiń 49%-y (79,1 myń) – jastar. Sondaı-aq, kóp balaly (18,5 myń), múgedektigi bar (3,7 myń) adamdar jáne múgedektigi bar balalardy tárbıelep otyrǵan (3,1 myń) áıelder jumysqa ornalastyrylǵan.

Sondaı-aq, taldaý kórsetkendeı, jumyspen qamtylǵan áıelderdiń 51,3%-y belsendi jumys izdeýde bolǵan, jumys isteıtin áıelderdiń 98%-dan astamy kásipkerlik qyzmetti bastaǵan.

Jumysqa ornalasý faktileri mindetti zeınetaqy jarnalarymen rastalady. Máselen, jumysqa ornalastyrylǵan áıelderdiń 84%-dan astamy boıynsha osylaı rastalǵan.

«Qoldanystaǵy jumyspen qamtý tetikteriniń arqasynda 114 myń otbasynda eńbek tabysy paıda boldy, al 47 myń otbasynda jumys isteıtin otbasy músheleriniń sanynyń artýyna baılanysty tabysy ósti», - dep atap ótti Tamara Dúısenova.