Elde eńbek kitapshasy kimge jáne ne úshin qajet

ASTANA. KAZINFORM — Búginde eńbek kitapshasy qajet pe? Zeınetaqyny esepteý úshin eńbek ótilin kim jáne qalaı rastaýy tıis? 

Zeınet jasyna jaqyndaǵan azamattar úshin eńbek kitapshasynyń qajettiligi týraly suraq ózekti bolyp qala bermek.

Qazirgi tańda eńbek ótili elektrondy formatta tirkeledi, alaıda keıbir jaǵdaılarda qaǵaz qujattar da mańyzdy ról atqarady. Áleýmettik kodekstiń normalaryna sáıkes, eńbek ótili eńbek kitapshasymen rastalady.

— Eger eńbek kitapshasy bolmasa nemese onda qajetti jazbalar joq bolsa, eńbek ótili jumys týraly málimetterdi rastaıtyn qujattarmen nemese sot sheshimimen belgilenedi. Eńbek kodeksine sáıkes, eńbek qyzmetin rastaý retinde mindetti zeınetaqy jarnalarynyń turaqty aýdarymdaryn kórsetetin jeke zeınetaqy shotynan alynǵan úzindi de qabyldanady, — delingen BJZQ málimetinde. 

2021 jyldyń 1 qańtarynan bastap Qazaqstanda eńbek qyzmetiniń elektrondyq esebi engizildi.

— Eńbek sharttarynyń jasalýy men buzylýy týraly barlyq málimet Biryńǵaı eńbek sharttaryn esepke alý júıesine avtomatty túrde túsedi. Eńbek kitapshasyn saqtaý qajet pe? Joǵaryda aıtylǵandaı, eńbek kitapshasy bazalyq jáne yntymaqty zeınetaqy tólemderin esepteý úshin eńbek ótilin rastaýǵa qajet bolýy múmkin, — delingen habarlamada. 

Aıta ketelik qaǵaz nusqadaǵy eńbek kitapshalary mindetti me degen saýalǵa mınıstr jaýap bergen edi.