Elde elektr energııasyn tutyný qanshalyqty ósti
ASTANA. KAZINFORM – 2025 jyly elektr energııasyn óndirý 5,2 mlrd kVt/saǵatqa nemese 4,4 paıyzǵa ósti. Bul týraly Úkimet otyrysynda «KEGOC» AQ Basqarma tóraǵasy Nábı Aıtjanov málim etti.
- Ótken kúzgi-qysqy kezeńde Qazaqstannyń Birtutas elektr energetıkalyq júıesiniń tutyný maksımýmy 2025 jylǵy 18-shi jeltoqsanda tirkelip, 17 724 MVt-ty qurady. 2024-2025 jyldardaǵy kúzgi-qysqy kezeńmen salystyrǵanda júkteme maksımýmy 3 paıyzǵa ósip, 521 MVt-ty qurady. 2025 jyly elektr energııasyn tutyný 2024 jylmen salystyrǵanda 4,6 mlrd kVt/saǵatqa nemese 3,8 paıyzǵa artyp, 124,6 mlrd kVt/saǵatty qurady. 2025–2026 jyldardaǵy kúzgi-qysqy kezeńde elektr energııasyn tutyný kólemi aldyńǵy kezeńmen salystyrǵanda 1,6 mlrd kVt/saǵatqa, ıaǵnı 2,4 paıyzǵa ósip, 66,9 mlrd kVt/saǵatty qurady, - dedi N. Aıtjanov.
Onyń aıtýynsha, 2025 jyly elektr energııasyn óndirý 5,2 mlrd kVt/saǵatqa nemese 4,4 paıyzǵa ósip, 123,1 mlrd kVt/saǵatty qurady. 2025-2026 jyldardyń kúzgi-qysqy kezeńinde ótken jyldyń osyndaı kezeńimen salystyrǵanda 2,3 mlrd kVt/saǵatqa nemese 3,5 paıyzǵa ósip, 66,9 mlrd kVt/saǵatty qurady.
- 2026 jylǵy 1 qańtarda elektr stantsııalarynyń jalpy belgilengen qýaty 26,8 GVt-ty qurady, onyń ishinde 51 paıyzy – kómirmen jumys isteıtin jylý elektr stantsııalary (13679,0 MVt), 26 paıyzy – gazben jáne mazýtpen jumys isteıtin jylý elektr stantsııalary (6846,8 MVt), 9 paıyzy - gıdroelektr stantsııalary (2534,8 MVt), 14 paıyzy – jańartylatyn energııa kózderi (3746,3 MVt). 2025 jyly Qazaqstan Respýblıkasynda jańa generatsııany iske qosý kólemi 1577,8 MVt-ty qurady. Bul rette jylý elektr stantsııalary – 870,1 MVt, jańartylatyn energııa kózderi – 707,7 MVt, - dedi basqarma tóraǵasy.
Osy oraıda ol 2025 jyly elektr energııasyn óndirý negizinen jylý elektr stantsııalarymen qamtamasyz etilip, 74 paıyzdy quraǵanyn atap ótti. Gaztýrbınalyq elektr stantsııalary 11 paıyz, dástúrli gıdroelektr stantsııalary – 8 paıyz jáne jańartylatyn energııa kózderiniń elektr stantsııalary 7 paıyz kóleminde elektr energııasyn óndirdi.
Onyń sózine qaraǵanda, paıdalaný merzimi 30 jyldan asqan generatsııalaıtyn jabdyqtardyń úlesi - 45 paıyz. Jabdyqtar birtindep jańaryp kele jatyr, ıaǵnı byltyrmen salystyrǵanda eskirgen jabdyqtar 3 paıyzǵa azaıdy.
Aıta keteıik, elimizdegi 5 jylý elektr ortalyǵy «qyzyl» aımaqta turǵany málim boldy.
