Elde drondar joldaǵy aqaýdy avtomatty túrde anyqtaıdy
ASTANA. KAZINFORM — Qazaqstanda jol sapasyn baqylaý úshin drondardy engizý josparlanyp otyr. Qazaqstanda avtomobıl joldarynyń jaı-kúıin baqylaýǵa arnalǵan jańa býyn ushqyshsyz ushatyn apparat synaqtan ótti.
DJI Matrice 400 dronynyń lazerlik lıdarmen jabdyqtalǵan múmkindikteri Aqmol – Vozdvıjenka – Talapker oblystyq mańyzy bar avtomobıl jolynyń ýchaskesinde kórsetildi. Bul jańashyldyq jol tósemindegi aqaýlardy avtomattandyrylǵan túrde anyqtaýǵa baǵyttalǵan.
Qurylǵynyń tehnologııalyq bazasy tekserý protsesin aıtarlyqtaı jedeldetýge múmkindik beredi. LiDAR jáne mmWave-radaryn paıdalaný arqyly joldyń betki qabaty skanerlenip, tegis emes jerler men zaqymdanýlar naqty ýaqyt rejıminde tirkeledi.
Derekterdi jınaý protsesi barynsha avtomattandyrylǵan. Operator ushý aımaǵyn belgilegennen keıin dron marshrýtty ózdiginen qurastyrady. Júıe O4 Enterprise Enhanced derekterdi berý tehnologııasymen jabdyqtalǵan, bul turaqty baılanysty jáne zamanaýı baǵdarlamalyq qamtamasyz etýmen, sonyń ishinde jasandy ıntellekt elementterimen tıimdi jumys isteýdi qamtamasyz etedi. Intellektýaldy anyqtaý, kórinetin jáne jylý arqyly túsirilim jasaý, sondaı-aq AR-vızýalızatsııa fýnktsııalary qoljetimdi. Bul kúrdeli meteorologııalyq jaǵdaılarda jáne kórý múmkindigi tómen kezde de tıimdi jumys isteýge múmkindik beredi.
Sonymen qatar, dron qatty jel jaǵdaılaryna beıimdelgen, bul ashyq dala óńirleri úshin asa mańyzdy.
Osyndaı tehnologııalardy engizý jol qozǵalysy qaýipsizdigin arttyrý jáne avtomobıl joldarynyń sapasyn jaqsartý úshin strategııalyq mańyzdy qadam retinde qarastyrylady. Erte dıagnostıka aqaýlardy qaýipti deńgeıge jetpeı turyp joıýǵa múmkindik beredi.
Qazirgi ýaqytta bul tehnologııany avtojoldardyń jaı-kúıin keshendi dıagnostıkalaý úshin qoldaný múmkindigi qarastyrylyp jatyr. Ol aqaýlardy avtomatty túrde anyqtap qana qoımaı, olardyń kólemin de dál baǵalaýǵa múmkindik beredi.
Aıta ketelik Premer-mınıstr jol sapasyn baqylaý úshin JI engizý qajet ekenin aıtyp, tsıfrlyq platforma ázirleýdi tapsyrǵan edi.