Elde derekterdi qorǵaýdyń jańa tásilderi engiziledi
ASTANA.KAZINFORM – Derekter kólemi ósken saıyn, senimdi qorǵanys máseleleri de memleket pen bıznes úshin mańyzdy ekeni sózsiz. Qatysýshylar tsıfrlyq júıelerdiń qaýipsizdigi tek shıfrlaý algorıtmderiniń kúrdeliligine ǵana baılanysty emes ekenin talqylaı otyryp, búginde tsıfrlyq kiltterdiń qanshalyqty saýatty basqarylatyny, baǵdarlamalardyń durys baptalýy, sertıfıkattaýdyń qalaı ótetini jáne barlyq kezeńde kıbergıgıenanyń negizgi erejeleriniń saqtalýy sııaqty praktıkalyq dúnıeler aldyńǵy qatarǵa shyǵatynyn alǵa tartty.
Jasandy ıntellekt jáne tsıfrlyq damý mınıstrliginde aqparatty krıptografııalyq qorǵaý quraldary (AKQQ) naryǵynyń aldaǵy perspektıvalaryna arnalǵan sarapshylyq kezdesý ótti.
Jasandy ıntellekt jáne tsıfrlyq damý vıtse-mınıstri Dosjan Musalıevtiń tóraǵalyǵymen ótken jıynǵa beıindi Aqparattyq qaýipsizdik komıtetiniń, múddeli memlekettik organdardyń ókilderi, sondaı-aq jetekshi ІT-kompanııalar men sala sarapshylary qatysty.
Talqylaý barysynda qatysýshylar krıptografııanyń tek «qyzmettik paıdalanýǵa arnalǵan» tehnıkalyq qural bolýdan qalyp, búkil tsıfrlyq ekonomıkamyzdyń kórinbeıtin, biraq berik irgetasyna aınalǵanyna qatysty ortaq pikirge keldi. Kún saıyn bizdiń banktik aýdarymdarymyzdy, elektrondyq qujattarymyzdy, tsıfrlyq qoltańbalarymyzdy jáne mıllıondaǵan qazaqstandyqtyń derbes derekterin qorǵaıtyn dál osy krıptografııa bolyp otyr.
Derekter kólemi ósken saıyn, senimdi qorǵanys máseleleri de memleket pen bıznes úshin mańyzdy ekeni sózsiz. Qatysýshylar tsıfrlyq júıelerdiń qaýipsizdigi tek shıfrlaý algorıtmderiniń kúrdeliligine ǵana baılanysty emes ekenin talqylaı otyryp, búginde tsıfrlyq kiltterdiń qanshalyqty saýatty basqarylatyny, baǵdarlamalardyń durys baptalýy, sertıfıkattaýdyń qalaı ótetini jáne barlyq kezeńde kıbergıgıenanyń negizgi erejeleriniń saqtalýy sııaqty praktıkalyq dúnıeler aldyńǵy qatarǵa shyǵatynyn alǵa tartty.
Otandyq ázirlemelerdi qoldaý máselesi talqylaýdyń bólek taqyrybyna aınaldy. Sarapshylar ımportqa táýeldilikti azaıtý, memlekettik júıelerge degen senimdi nyǵaıtý jáne erteńgi kúnniń syn-qaterlerine, sonyń ishinde postkvanttyq krıptografııaǵa kóshýge daıyndyq úshin shıfrlaý salasyndaǵy qýatty otandyq ІT-ónimderdi jasaýdy yntalandyrý máselelerin qozǵady. Mınıstrlikte vedomstvo, bıznes jáne kásibı qoǵamdastyq arasyndaǵy dál osyndaı ashyq ári tikeleı dıalog ádil básekelestik ortany qurýǵa kómektesetinin atap ótti.
— Búgingi tańda krıptografııa — bul jáı ǵana qaýipsizdik talaptary emes, bul tsıfrlyq egemendik pen azamattardyń memlekettik servısterge degen senimi máselesi. Biz otandyq sheshimderimizdiń senimdi de, básekege qabiletti bolýyna umtylamyz. Bizdiń maqsatymyz — qazaqstandyq bıznes óziniń krıptografııalyq ónimderin belsendi damytyp, engize alatyndaı jaǵdaı jasaý, bul ınfraqurylymdy jyldar boıy qorǵaýdy, sonyń ishinde kvanttyq tehnologııalar dáýirine daıyndyqty qamtamasyz etedi, — dedi Vıtse-mınıstr Dosjan Musalıev.
Kezdesý sońynda mınıstrlik derekterdi qorǵaý tásilderin jetildip, tsıfrlyq Qazaqstandy árbir adam úshin qaýipsiz ári jaıly etetin sheshimderdi qoldaıtyny jáne bul júıeli jumysty odan ári jalǵastyratyny atap ótildi.
Aıta ketelik Qazaqstanda jańa kıberqaýipsizdik standarttary engiziletini týraly jazǵan edik.
