Elde dárilik jáne medıtsınalyq zattardyń aınalymyn retteıtin normalar qabyldandy
ASTANA. KAZINFORM — Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine tehnıkalyq jáne kásiptik bilim berý júıesin jetildirý, halyqtyń kóshi-qony máseleleri boıynsha ózgerister men tolyqtyrýlar engizý týraly» Zańy ekinshi oqylymda qaralyp, qabyldandy.
Zań jobasy QR Parlamenti Májilisinde 2025 jylǵy 10 jeltoqsanda tirkelip, bıylǵy 28 mamyrynda birinshi oqylymda maquldandy. Qujattyń maqsaty – áleýmettik zańnamany jetildirý, onyń ishinde tehnıkalyq jáne kásiptik bilim berýdiń (TjKB) básekege qabiletti júıesin qalyptastyrý jáne kóshi-qon saıasatyn jetildirý.
Májilistiń Áleýmettik-mádenı damý komıtetiniń málimetinshe, zańnyń negizgi erejeleri mynalardy kózdeıdi:
1) TjKB júıesin jetildirý bóliginde:
- eńbek shartyn jasasý úshin kásibı biliktilik sertıfıkattaryn taný;
- jumys berýshilerdiń TjKB-niń bilim berý baǵdarlamalaryn ázirleýge qatysýy;
2) halyqtyń kóshi-qony bóliginde:
- azamattardyń eńbek kúshi artyq óńirlerden eńbek kúshi tapshy óńirlerge qonys aýdarý tártibin aıqyndaý;
- jumys kúshiniń utqyrlyǵyn arttyrý maqsatynda erikti túrde qonys aýdarýǵa járdem kórsetý;
- eńbek deldaldyǵyna baqylaýdy kúsheıtý;
Sondaı-aq jumys toptarynyń otyrystary barysynda jáne depýtattar usynǵan túzetýler negizinde qujatqa tıisti túzetýler engizildi. Birinshiden, densaýlyq saqtaý máseleleri boıynsha:
- halyqtyń sanıtarııalyq-epıdemıologııalyq salamattylyǵy men qaýipsizdigin qamtamasyz etetin, sondaı-aq dárilik zattar men medıtsınalyq zattardyń aınalymyn retteıtin normalar qabyldandy;
- respýblıkada qoldanylatyn medıtsınalyq gazdardy retteý úshin «medıtsınalyq gaz» uǵymy, ony memlekettik tirkeý jáne medıtsınalyq emes maqsattarda paıdalanýǵa tyıym salý talaptary engiziledi;
Ekinshiden, halyqty áleýmettik qorǵaý máselesi baǵytynda:
- zeınet jasyndaǵy azamattardyń ómir súrý sapasyn arttyrýǵa baǵyttalǵan uıymdar qyzmetiniń tártibi zańnamalyq turǵyda aıqyndalady;
- múgedektigi bar adamdardy jumysqa ornalastyrýǵa arnalǵan jumys oryndary kvotasyn belgileý, monıtorıngteý jáne olardyń oryndalýyn baǵalaý qaǵıdalary belgilenedi;
- salymshynyń ótinishi negizinde zeınetaqy jınaqtaryn ınvestıtsııalyq portfeldi basqarýshyǵa ınvestıtsııalyq basqarýǵa berý arqyly olardy basqarý tártibin jetildirý normalary usynyldy;
Úshinshiden, ınklıýzıvti bilim berý máseleleri boıynsha:
- densaýlyǵynda aýytqýlary bar erte jastaǵy balalardy (3 jasqa deıin) anyqtaý jáne qoldaý tártibi kózdeledi;
- múmkindigi shekteýli balalarǵa arnaıy psıhologııalyq-pedagogıkalyq qoldaý kórsetetin arnaıy bilim berý uıymdaryn lıtsenzııalaý belgilenedi;
- «ınklıýzıvti mádenıet», «ymdaý tili» uǵymdary jáne olarǵa ilespe normalar engiziledi.
Aıta keteıik, jaqynda Májilistiń jalpy otyrysynda depýtat Ekaterına Smolıakova Premer-mınıstr Oljas Bektenovtiń atyna joldaǵan depýtattyq saýalynda ınklıýzıvti ortany qalyptastyrýǵa qatysty máseleni kóterdi.
