Elde dári-dármekpen qamtamasyz etý baǵytynda tekserý júrip jatyr - Eljan Birtanov
«Biryńǵaı dıstrıbıýtordyń satyp alý tártibi ózgertildi. Dári-dármektiń satyp alý júıesin ashyq júrgizý maqsatynda onlaın-translıatsııa ótkizildi. Bul dárilik zattarǵa baǵany tómendetýge múmkindik berdi, 18 mlrd teńgeden astam qarjyny únemdeýge jol ashyldy. Bul qarjy halyqqa dári-dármekti qosymsha satyp alýǵa baǵyttalǵan», - dedi vedomstvo basshysy.
Mınıstrdiń atap ótýinshe, dárilik zattarmen qamtý baǵytynda problemalar áli de kezdesýde.
«Halyqtyń dárimen qamtamasyz etilý jaǵdaılarynda júrgiziletin taldaý nátıjesinde biz birqatar júıeli problemalardy anyqtadyq. Birinshiden, medıtsınalyq uıymdardyń dárilik zattardyń qajettiligin durys qalyptastyra almaýymen, ekinshiden, óńirlerdiń aqparattyq júıelerindegi qate derekterdiń engizilýi, al úshinshiden, dárilerdiń qoǵalysyn baqylaý men esepke alýdyń buzylýy, tórtinshiden, tegin ambýlatorııalyq dári-dármekpen qamtamasyz etýdiń jetkiliksiz qarjylyq shyǵynymen baılanysty», - dep toqtaldy mınıstr.
Sonymen qatar E. Birtanov 2017 jyly tegin dáriler alǵan em qabyldaýshylarǵa iriktelip qońyraý shalynǵanyn, saýalnama nátıjesinde olardyń 20 paıyzǵa jýyǵy dárini almaǵany anyqtalǵanyn atap ótti.
«Osy jaǵdaılardyń negizinde mınıstrlik ákimdiktermen birlesip, qazirgi kezde eldiń barlyq óńirlerinde medıtsınalyq uıymdardy jospardan tys tekserý júrgizýde. Onyń nátıjesi problemalardy joıýdyń qosymsha sharalardy qolǵa alýǵa, al keıbir jaǵdaılarda tártiptik jaza qabyldaýǵa negiz bolady. Em qabyldaýshylardyń dári-dármekpen qamtamasyz etilmeý jaǵdaılarynyń qaıtalanýyna jol bermeý maqsatynda tolyqqandy jumystar atqarylady», - dedi Eljan Birtanov.