Elde dárigerdi soqqyǵa jyǵý oqıǵalarynyń kóbi tirkelmeı jatyr — depýtat

ASTANA. KAZINFORM — Búgin Parlament Májilisiniń jalpy otyrysynda dárigerler men jedel járdem qyzmetkerlerin qorǵaýǵa arnalǵan zań jobasy birinshi oqylymda qaralyp jatyr.

— Biz mynany anyq túsinýimiz kerek: jedel járdemge qarsylyq kórsetý — bul jaı ǵana tóbeles emes. Mas buzaqy jedel járdem júrgizýshisin urǵan kezde, ol ony ǵana uryp jatqan joq. Ol — kórshi kóshede tynysy toqtap jatqan, dene qyzýy kóterilip, sol járdemdi kútip jatqan kishkentaı balany urdy. Ol — ınsýlt nemese ınfarkt alǵan, endi sol jedel járdem jete almaıtyn ájeni urdy. Bir buzaqynyń kesirinen jedel járdemniń bir brıgadasy, kóligi isten shyǵyp qalady. Sondyqtan osy járdemniń naýqastarǵa jetý ýaqyty uzardy. Al ınfarkt pen ınsýlt kezinde esep saǵatpen emes, mınýtpen ólshenetinin jaqsy bilemiz. Sondyqtan bul — ómir men ólim máselesi, — dedi depýtat Ashat Aımaǵambetov.

Osy oraıda depýtat bul jaǵdaıǵa qatysty statıstıkaǵa toqtaldy. Tek Densaýlyq saqtaý mınıstrliginiń resmı derekteri boıynsha sońǵy bes jylda 280 osyndaı oqıǵa tirkelgen.

— Biraq ashyǵyn aıtaıyq, bul — aısbergtiń tek basy ǵana. Shynaıy jaǵdaıda 10 esege kóp bolýy múmkin. Medıtsına qyzmetkerleri búginde soqqy jyǵý týraly kóbinese aryzdanbaıdy, óıtkeni olardy qorǵaıtynyna senim joq. Buǵan qosa, dárigerler jumystyń ornyna tergeýmen júrýge ýaqyt joǵaltqysy kelmeıdi, — dedi A. Aımaǵambetov.

Eske salsaq, bıyl jazda Qostanaıda dárigerdi soqqyǵa jyqqan buzaqy eki aıǵa qamaýǵa alyndy. 

Sonymen qatar, maýsym aıynda Qaraǵandy oblysynda er adam eki dárigerdi soqqyǵa jyqqany málim boldy.