Elde búginge deıin 3 270 aǵza transplantatsııasy jasaldy
ASTANA. KAZINFORM — Qazaqstanda sońǵy jyldary aǵza transplantatsııasy boıynsha jasalatyn operatsııalar sany artyp keledi.
Bul týraly Respýblıkalyq transplantologııa jáne joǵary tehnologııalyq medıtsınalyq qyzmetterdi úılestirý ortalyǵynyń dırektory Aıdar Sıtkazınov aıtty.
Onyń aıtýynsha, osy operatsııalardyń 2 700-den astamy tiri donorlardyń, al 500-den astamy qaıtys bolǵannan keıingi donorlardyń aǵzalaryn paıdalaný arqyly jasalǵan.
— Elimizde zamanaýı transplantatsııa salasy jolǵa qoıylǵan 2012 jyldan beri 3 270 aǵza transplantatsııasy jasaldy. Onyń ishinde 2 413 búırek, 636 baýyr, 118 júrek, 28 ókpe, 73 kózdiń qasań qabyǵy jáne 2 uıqy bezi transplantatsııasy bar, — dedi ol.
Sonymen qosa ol sońǵy jyldary qaıtys bolǵan donorlardyń aǵzasyn paıdalaný arqyly jasalatyn transplantatsııalar sany da óskenin atap ótti.
— Máselen, 2024 jyly osyndaı 23 operatsııa jasalsa, 2025 jyly olardyń sany 68-ge jetip, shamamen úsh ese artqan. Bul úrdis bıyl da jalǵasyp otyr, — dedi ortalyq basshysy.
Sonymen qatar onyń sózinshe, aǵzalary transplantatsııaǵa alynǵan qaıtys bolǵan donorlar sany 2024 jylǵy 6-dan 2025 jyly 18-ge deıin ósken.
Aıdar Sıtkazınovtyń aıtýynsha, qaıtys bolǵan donorlar sanynyń artýy transplantatsııa kútip júrgen patsıentterdiń ómirin saqtap qalýǵa múmkindik beredi. Óıtkeni bir donordyń aǵzasy birneshe adamǵa ómir syılaýy múmkin.
Aıta keteıik, elimizde donorlyq aǵzaǵa muqtaj 4739 adam transplantatsııa kezeginde tur. Olardyń 125-i — balalar.
