Elde biryńǵaı QR-kodty kim retteıdi — Qarjy agenttigi túsinikteme berdi
ASTANA. KAZINFORM — Qarjy naryǵyn retteý jáne damytý agenttigi vedomstvonyń qyzmeti týraly taratylyp jatqan aqparattyń jalǵan ekenin habarlady. Biryńǵaı QR-kodty retteý agenttiktiń quzyretine kirmeıdi.
— Máselen, biryńǵaı bankaralyq QR-kodty retteý máseleleri agenttiktiń quzyretine jatpaıdy. «Qazaqstan Respýblıkasynyń Ulttyq banki týraly» QR Zańyna sáıkes QR-kodtyń jumys isteýi, tólem júıelerin retteý máseleleri QR Ulttyq bankiniń quzyretine jatady. Agenttik bankaralyq ekvaırıng jónindegi komıssııany belgilemeıdi jáne tólem júıeleriniń tarıf saıasatyn retteýdi júzege asyrmaıdy. Jalǵan aqparatqa senbeýlerińizdi jáne resmı aqparat kózderin paıdalanýyńyzdy suraımyz, — delingen habarlamada.
Agenttik mıkroqarjy uıymdarynyń qyzmetin turaqty qadaǵalaýdy júzege asyrady. Zańnama talaptaryn buzǵany úshin 2021 jyldan bastap 127 mıkroqarjy uıymy men 135 kollektorlyq agenttiktiń lıtsenzııasy keri qaıtaryldy, onyń ishinde 2024-2026 jyldary 55 mıkroqarjy uıymy men 29 kollektorlyq agenttikke 500 mln teńgeden astam somaǵa 1,6 myń ákimshilik aıyppul salyndy.
Qadaǵalaý sharalary nátıjesinde azamattardyń borysh júktemesin tómendetý maqsatynda 2025 jyly 33,9 myń qaryz alýshynyń negizgi boryshy, syıaqysy, aıyppuldary men ósimpuldary tolyq nemese ishinara esepten shyǵaryldy, 722 myń qaryz alýshynyń bereshegi qaıta qurylymdaldy.
Budan basqa, 2024 jyly agenttik pen Ulttyq banktiń birlesken qaýlysymen jyldyq tıimdi syıaqy mólsherlemesiniń (JTSM) shekti mólsherleri: kepilsiz banktik qaryzdar men mıkrokredıtter boıynsha 56%-dan 46%-ǵa deıin, kepildi qaryzdar boıynsha 56%-dan 40%-ǵa deıin, al 45 AEK-ke deıingi onlaın-mıkrokredıtter boıynsha (45 kúnnen astam) eń joǵary kúndik mólsherleme 1%-dan 0,3%-ǵa deıin tómendetildi.
Qarjylyq alaıaqtyqqa qarsy is-qımyl quqyq qorǵaý organdarymen, Ulttyq bankpen jáne qarjy naryǵyna qatysýshylarmen vedomstvoaralyq ózara is-qımyl jasaý sheńberinde júzege asyrylady.
Alaıaqtyq operatsııalardyń jedel túrde jolyn kesý úshin qarjy uıymdary men memlekettik organdar arasynda aqparatty naqty ýaqyt rejıminde almasýdy qamtamasyz etetin Ulttyq banktiń Antıfrod-ortalyǵy jumys isteıdi. 2025 jyldyń basynan beri 68 mlrd teńgeden astam somaǵa 163 myńnan astam alaıaqtyq operatsııa toqtatylyp, 28,9 mlrd teńgeden astam somaǵa alaıaqtyq operatsııalar buǵattaldy.
Vedomstvo kredıtterdi alaıaqtyq jolmen resimdeýdiń aldyn alý maqsatynda zańnamalyq deńgeıde keshendi sharalardy iske asyrdy. Mindetti bıometrııalyq sáıkestendirý, onlaın-kredıtterdi berý kezinde sheshim qabyldaý kezeńi, birinshi kredıtti alý kezinde qaryz alýshynyń jeke qatysýy týraly talap engizildi, sondaı-aq alaıaqtyq jolmen resimdelgen kredıtter boıynsha tergeý júrgizilip jatqan kezeńde syıaqy esepteýge tyıym salyndy, alaıaqtyq kredıtterdi sottan tys jáne sot tártibimen esepten shyǵarýdyń negizderi keńeıtildi. Nátıjesinde, 2025 jyly bankter men mıkroqarjy uıymdary azamattardyń jalpy somasy 1,9 mlrd teńgeni quraıtyn 1,6 myń alaıaqtyq jolmen resimdelgen kredıtin esepten shyǵardy.
Buǵan deıin Qarjy naryǵyn retteý jáne damytý agenttigi klırıng qaǵıdalaryna ózgeris engizetinin jazǵanbyz.
