Elde bir jylda páter saýdasy azaıdy

2026 jylǵy tamyzben salystyrǵanda (35 807) mámileler sany 1,1%-ǵa azaıdy. Mámileler sany boıynsha Almaty (7 248 – 20,5%) jáne Astana (6 119 – 17,3%) qalalary, sonymen qatar, Qaraǵandy oblysy (2 540 – 7,2%) kósh bastap tur. Mámileler sany Ulytaý oblysynda eń az – 280 mámile (0,8%) tirkelgen.

2026 jylǵy tamyzben salystyrǵanda eń joǵarǵy ósim Túrkistan (24,8%), Jambyl (13,3%) jáne Jetisý (12,1%) oblystarynda tirkeldi. Eń úlken tómendeý Qostanaı (-10,2%), Qaraǵandy (-10,1%) oblystarynda jáne Almaty (-5,7%) qalasynda oryn aldy.

Kóppáterli úılerdegi turǵyn úı mámileler sany 2026 jylǵy tamyzdaǵy aıymen salystyrǵanda 2,2% (623 mámilege) azaıdy. 2026 jyldyń qyrkúıek aıynda páterler boıynsha barlyǵy 27 096 mámile jasaldy, bul mámilelerdiń jalpy sanynyń 76,5%. Kóppáterli úılerdegi turǵyn úı saýdasynyń negizgi úlesi Almaty (24,8%), Astana (22,1%) qalalaryna jáne Qaraǵandy oblysyna (7,8%) tıesili. Bólmeler sany boıynsha 1 bólmeli páterler satylymy basym boldy – 10 434 mámile.

2026 jylǵy tamyzben salystyrǵanda qyrkúıekte jeke turǵyn úıler boıynsha mámileler sany 2,7% (222 mámilege) kóbeıdi. Qyrkúıek aıynda barlyǵy 8 310 mámile tirkelgen. Jeke turǵyn úıler boıynsha mámileler sanynyń eń joǵarǵy ósimi Aqtóbe (22,4%), Túrkistan (18,3%) jáne Shyǵys Qazaqstan (16,6%) oblystarynda tirkeldi. Eń joǵarǵy tómendeý Qaraǵandy (-12,5%), Ulytaý (-10,9%) jáne Pavlodar (-9,2%) oblysynda baıqaldy.

2026 jylǵy qyrkúıekte turǵyn úıdi alyp-satý mámileleri aldyńǵy jyldyń tıisti aıymen salystyrǵanda 14,3% azaıdy (41 313-nen 35 406 mámilege deıin). Mámileler sanynyń eń joǵary ósimi Túrkistan (+24,7%) oblysynda baıqaldy, eń úlken tómendeý – Astana (-29,2%) qalasynda. 2026 jyldyń qańtar-qyrkúıek aılaryndaǵy mámileler sanyn 2025 jylǵy qańtar-qyrkúıek aılaryndaǵy mámileler sanymen salystyrǵanda 5,6% tómendeý baıqaldy.

Aıta ketelik baspana kezeginde turǵandar qandaı jeńildikterdi paıdalana alatyny týraly jazǵan edik.