Elde bir mezette 51 densaýlyq saqtaý nysanynyń qurylysy júrip jatyr

Mınıstrlik Memleket basshysynyń halyqqa medıtsınalyq kómektiń qoljetimdiligi men sapasyn arttyrý jónindegi tapsyrmalaryn iske asyrý sheńberinde medıtsınalyq ınfraqurylymdy damytýǵa baǵyttalǵan aýqymdy jobalardy júzege asyrýdy jalǵastyryp keledi.

— Búginde Qazaqstanda jalpy quny 108 mlrd teńgeni quraıtyn 51 densaýlyq saqtaý nysanynyń qurylysy qatar júrgizilip jatyr. Onyń ishinde 55 mlrd teńge «Aýyldyq densaýlyq saqtaýdy jańǵyrtý» ulttyq jobasy sheńberinde aýdandyq aýrýhanalardy jańǵyrtýǵa baǵyttalsa, taǵy 53 mlrd teńge bıýdjettik ınvestıtsııalyq jobalardy iske asyrýǵa qarastyrylǵan. Atap aıtqanda, Qyzylorda jáne Óskemen qalalarynda 300 tósektik kópbeıindi aýrýhanalardyń, Atyraý oblysynyń Órken jáne Nursaıa shaǵyn aýdandarynda emhanalardyń, Soltústik Qazaqstan oblysy Qyzyljar aýdanynyń Beskól aýylynda bir aýysymda 250 adam qabyldaýǵa arnalǵan jáne Taldyqorǵan qalasynda bir aýysymda 500 adam qabyldaýǵa arnalǵan emhanalardyń qurylysy jalǵasýda, — delingen vedomstvo habarlamasynda.

2026 jyly sondaı-aq 2025 jyly Arnaýly memlekettik qor qarajatynyń esebinen qarjylandyrylǵan birqatar nysandardy paıdalanýǵa berý josparlanyp otyr. Olardyń qatarynda Qaraǵandy qalasyndaǵy onkologııalyq dıspanser, Taldyqorǵan qalasyndaǵy oblystyq balalar aýrýhanasyn rekonstrýktsııalaý, Jetisý oblysyndaǵy Kerbulaq aýdandyq aýrýhanasy ǵımarattarynyń seısmıkalyq beriktigin kúsheıtý, sondaı-aq Óskemen qalasyndaǵy Gematologııa ortalyǵynyń qurylysy bar. Atalǵan jobalardy iske asyrý densaýlyq saqtaý júıesiniń ınfraqurylymyn edáýir nyǵaıtýǵa, medıtsınalyq kómek kórsetý úshin zamanaýı jaǵdaı jasaýǵa jáne elimizdiń barlyq óńiri turǵyndary úshin medıtsınalyq qyzmetterdiń qoljetimdiligin arttyrýǵa múmkindik beredi.

Aýyldyq densaýlyq saqtaýdy damytýǵa erekshe kóńil bólinip otyr. 

— 2026 jyldyń sońyna deıin 32 aýdandyq aýrýhanany jańǵyrtyp, olardy zamanaýı kópbeıindi aýdandyq ortalyq aýrýhanalar deńgeıine jetkizý josparlanǵan. Jańǵyrtý jumystary nysandardy kúrdeli rekonstrýktsııalaýmen ǵana shektelmeı, kompıýterlik tomograftar men angıografııalyq keshenderdi qosa alǵanda, zamanaýı joǵary tehnologııalyq medıtsınalyq jabdyqtarmen jaraqtandyrýdy da qamtıdy. Bul, ásirese ınsýlt pen ınfarkt kezinde adam ómiri men densaýlyǵyn saqtap qalýda sheshýshi mańyzǵa ıe bolatyn «altyn saǵat» qaǵıdaty sheńberinde kórsetiletin ýaqtyly medıtsınalyq kómektiń tıimdiligin arttyryp, jedel jaǵdaıdaǵy patsıentterdi dıagnostıkalaý men emdeýdiń jedeldigin edáýir jaqsartýǵa múmkindik beredi, — delingen habarlamada.

Mamandardyń baǵalaýynsha, jobany iske asyrý nátıjesinde júrek-qantamyr aýrýlary men ınsýltten bolatyn ólimniń deńgeıi shamamen 20 paıyzǵa tómendeıdi.

Medıtsınalyq ınfraqurylymdy damytýdyń mańyzdy baǵyttarynyń biri — memlekettik-jekeshelik áriptestik. Qazirgi tańda elde Kókshetaý qalasynda 630 tósektik, Qosshy qalasynda 350 tósektik zamanaýı kópbeıindi aýrýhanalar, sondaı-aq Almaty qalasynda jańa medıtsınalyq keshen salý boıynsha iri ınvestıtsııalyq jobalar júzege asyrylyp jatyr.

Memlekettik saıasattyń basym baǵyttarynyń biri — ana men bala densaýlyǵyn saqtaý qyzmetin damytý. Memleket basshysynyń tapsyrmasy boıynsha zamanaýı perınataldyq ortalyqtar jelisin salý baǵdarlamasy iske asyrylyp jatyr. 2029 jylǵa deıin Astana qalasynda (eki ortalyq), Almaty, Shymkent, Qaraǵandy, Almaty oblysynyń Qaskeleń, Qyzylorda, Oral qalalarynda jáne Túrkistan oblysynyń Temirlan aýylynda barlyǵy toǵyz perınataldyq ortalyqtyń qurylysy josparlanǵan. 

Zamanaýı jabdyqtarmen jaraqtandyrylǵan medıtsınalyq uıymdardy qurý azamattardyń turǵylyqty jerine qaramastan medıtsınalyq kómektiń sapasy men qoljetimdiligin arttyrýǵa, joǵary tehnologııalyq medıtsınany damytýǵa jáne densaýlyq saqtaý salasynyń kadrlyq áleýetin nyǵaıtýǵa yqpal etedi.

Buǵan deıin Qazaqstan medıtsınalyq týrısterge arnalǵan «bir tereze» júıesin engizetinin jazǵanbyz.