Elde birlik bar kezde ǵana ekonomıka damıdy - Saparbaev
AQTÓBE. QazAqparat - Búgin Aqtóbe oblysynyń ákimi Berdibek Saparbaev óńirdegi úkimettik emes uıym ókilderimen kezdesti. Bosqosýda jastar tárbıesi, qylmystyń aldyn alý, jat aǵymmen kúres jumystary talqylandy, dep habarlaıdy QazAqparat tilshisi.
Bılik búgin úkimettik emes uıymdardyń kómegine muqtaj. Ásirese, bala tárbıesi, jastarmen jumys tusy aqsap tur. «Qoǵam men basqarý qurylymdarynyń arasynda áriptestik bolsa, onda halyqtyń turmysy, jaǵdaıy jaqsy bolady. Ekonomıkany damytýǵa bolady. Biraq rýhanı, mádenı baılyq bolmasa, halyqtyń arasynda birlik bolmaıdy, damý kezinde de suraqtar týyndaıdy. Shynyn aıtý kerek, artymyzǵa, aldymyzǵa qaraýymyz kerek. Ol úshin ár azamat «Ne istedim?» dep óz-ózine suraq qoıǵany jón. «Balalarymdy, nemerelerimdi, qasymdaǵy jerlesterimdi qalaı tárbıelep jatyrmyn?» dep oılaný kerek. Sol kezde kóp nárseni qalpyna keltirýge bolady. Eshnársege beıjaı qaraýǵa bolmaıdy. Elbasy Joldaýynda adam kapıtalyna toqtaldy. Eger mádenıetten, ónerden, ádebıetten 10 jyl qalyp qoısaq, ony qalpyna keltirý úshin 20 jyl kerek. Al ekonomıkadan 10 jylǵa qalsaq, 2-3 jylda qaıtyp qalpyna keltirýge múmkindik bar»,- dedi oblys ákimi Berdibek Saparbaev.
Aıta keteıik, sońǵy jyldary Aqtóbede jasóspirimder qylmysy órship barady. Óz-ózine qol jumsaıtyndardyń qatary artyp, jat aǵym jetegine erip, adasqandar da bar. «Táýelsizdiktiń alǵashqy jyldarynda qıyndyqtardy qajyrly qaıratpen, tózimdilikpen, eńbekpen jeńe bilgen halyq naryqqa beıimdelip, jańa arnaǵa tústi. Osy jyldary el ekonomıkasy, óndiris qarqyndy damyǵanymen qoǵamdaǵy adamgershilik, rýhanı damý, mádenı jańǵyrý bul qarqynǵa ilese almaı kele jatyr. Sońǵy jyldary qoǵamda rýhany jutańdyq sezilip, nemquraılylyq, masyldyq, jalqaýlyq sekildi jaǵymsyz ádetter kóbeıdi. Sebebi nede? Qoǵamnyń ár múshesin osy suraq oılandyrýy tıis. Máselen, Aqtóbede sýıtsıd kóbeıdi. 2015 jyly 4, 2016 jyly 12 jaǵdaı tirkeldi. Al bıyl 4 jasóspirim óz-ózine qol jumsaýǵa oqtalǵan. Ekinshiden, jasóspirimder arasynda qylmys kóbeıdi. Bıyl 34 qylmys tirkeldi. Ásirese, aýyr qylmys jasaǵandardyń qatary artyp barady. Úshinshiden, dinı ahýal. Ekpeden bas tartýshylar sany artyp barady. Tórtinshiden, ǵalamtor men áleýmettik jeli arqyry óz-ózine qol jumsaýǵa, jat aǵymdy nasıhattaý deregi kóbeıdi. Zorlyq-zombylyq beınematerıaldary artty. Munyń bári bilim men mádenıetimizdiń tómendigin kórsetedi. Bilimdi adam bireýdiń aıtqanymen emes, óz aqylymen júredi»,- dedi oblystyq ishki saıasat basqarmasynyń basshysy Erbol Nurǵalıev.
Kezdesý kezinde qoǵamdaǵy máselelerdi sheshýdiń birneshe joly usynyldy. Ásirese, ardagerlerdiń rólin arttyryp, tárbıeni balabaqsha, mektepten bastaý usynyldy. «Bılik bilim berý, tárbıe sapasyn arttyrýǵa baǵyttalǵan keshendi jumystardy júrgizip jatyr. Barlyq problemany mektep pen muǵalim artyp qoıý jón emes. Qoǵamnyń qoldaýy qajet. Ata-ana, qoǵamdyq uıymdarmen birlesken jumysty kúsheıtý kerek. Úkimettik emes uıymdar oqýshylardyń bos ýaqytyn tıimdi ótkizý úshin túrli sharalar, tárbıelik keshter ótkizse deımiz»,- dedi E.Nurǵalıev.
