Elde benzın tapshylyǵyna jol bermeý úshin qandaı sharalar qabyldanyp jatyr
ASTANA. KAZINFORM — Qazaqstannyń ishki naryǵynda janar-jaǵarmaı tapshylyǵy bolmaıdy. Bul týraly brıfıng barysynda jýrnalısterdiń saýalyna jaýap bergen QR Energetıka vıtse-mınıstri Qaıyrhan Tutqyshbaev málim etti.
Jýrnalıster Omby munaı óńdeý zaýytyndaǵy jaǵdaıdyń Qazaqstannyń ishki naryǵyna áseri jáne soltústik óńirlerden Reseıge benzın áketilip jatqany týraly aqparatqa qatysty suraq qoıdy.
Vıtse-mınıstrdiń aıtýynsha, Reseıdegi atalǵan jaǵdaı Qazaqstannyń munaı óńdeý zaýyttarynyń jumysyna áser etpeıdi.
— Omby munaı óńdeý zaýytynda bolǵan jaǵdaı bizdiń munaı óńdeý zaýyttaryna eshqandaı áserin tıgizbeıdi. Energetıka mınıstrligi ulttyq kompanııalarmen birlesip, ishki janar-jaǵarmaı balansyn jáne qoryn qalyptastyrdy. Bul halyqty turaqty qamtamasyz etýge jaǵdaı jasap otyr, — dedi Qaıyrhan Tutqyshbaev.
Onyń aıtýynsha, janar-jaǵarmaı naryǵyndaǵy turaqtylyqty saqtaý úshin memleket shekaradan kólik quraldarynyń ótýine qatysty qosymsha sharalar qabyldaǵan.
— Júk kólikteri men jeńil avtokólikterdiń táýligine bir retten artyq bizdiń memleketke kirip, bizdiń memleketten shyǵa almaıdy. Bul sharalar janar-jaǵarmaı quıý stantsııalaryndaǵy janar-jaǵarmaı balansyn saqtap qalýǵa múmkindik berip otyr, — dedi ol.
Vıtse-mınıstr otandyq munaı óńdeý zaýyttary shtattyq rejımde jumys istep jatqanyn atap ótti.
— Qazirgi ýaqytta ishki naryqta qandaı da bir janar-jaǵarmaı tapshylyǵy bolady degen sóz ol shyndyqqa jatpaıdy. Sondyqtan tek resmı aqparatqa súıenýdi suraımyz, — dedi Qaıyrhan Tutqyshbaev.
Sonymen qatar ol Qazaqstannan Reseıge benzınniń baqylaýsyz shyǵarylyp jatqany týraly aqparatqa túsinikteme berdi. Vıtse-mınıstr zańsyz janar-jaǵarmaı áketý faktilerin anyqtaý boıynsha tıisti memlekettik organdarmen birlesip jumys júrgizilip jatqanyn aıtty.
Brıfıng barysynda suıytylǵan munaı gazynyń baǵasyna qatysty da suraq qoıyldy.
Qaıyrhan Tutqyshbaev jaqyn arada suıytylǵan gaz baǵasyn kóterý týraly aqparattyń shyndyqqa janaspaıtynyn málimdedi.
— Qazirgi tańda suıytylǵan munaı gazynyń baǵasyn kóterý máselesi Energetıka mınıstrligi tarapynan qarastyrylyp otyrǵan joq, — dedi ol.
Aıta keteıik, Qazaqstan Qyrǵyzstannyń benzın jetkizý jónindegi ótinishin qarastyryp jatqany aıtyldy.
