Elde bas dárigerler men olardyń orynbasarlary attestatsııadan óte almaı jatyr

Qazaqstanda perzenthanalar, balalar statsıonarlary men jedel medıtsınalyq járdem stantsııalarynyń basshylary jáne olardyń orynbasarlaryn attestattaý jalǵasyp jatyr. 2026 jylǵy 2 qarashadaǵy jaǵdaı boıynsha testileýge qatysýshylardyń 20%-y ótý balyn jınaı almaǵan.

Attestattaýdyń birinshi kezeńi (testileý) 14 qazannan bastap ótkizilip keledi. Kórsetilgen kúnge deıin oǵan 15 óńirden 235 adam qatysqan. Bul attestattaýdan ótýge tıis qatysýshylardyń jalpy sanynyń 72,1%-yn quraıdy.

— Aldyn ala nátıjeler boıynsha 188 qatysýshy nemese 80%-y testileýden sátti ótken. Taǵy 47 adam (20%) qajetti ball jınaı almaǵan. Olardyń qatarynda 25 basshy jáne 22 basshynyń orynbasary bar. Sonymen qatar 27 adam testileýge kelmegen.

Teris nátıje kórsetkenderdiń eń kóp sany Aqmola, Mańǵystaý jáne Qostanaı oblystarynda tirkeldi. Bul úsh óńirge ótý balyn jınaı almaǵan qatysýshylardyń jalpy sanynyń 55,3%-y tıesili.

Astana qalasy men Pavlodar oblysynda barlyq qatysýshylar testileýden sátti ótti, — delingen DSM habarlamasynda.

Medıtsınalyq uıymdar basshylarynyń kásibı quzyrettiligin baǵalaý medıtsınalyq kómektiń sapasy men qaýipsizdigin qamtamasyz etýde tikeleı mańyzǵa ıe. Óıtkeni uıymdardyń jumysyn uıymdastyrý, ishki úderisterdiń tıimdiligi jáne medıtsınalyq qyzmetterdiń ýaqtyly kórsetilýi basqarýshylyq sheshimderge baılanysty.

Attestattaý tek atalǵan medıtsınalyq uıymdardyń basshylary men olardyń orynbasarlaryna qatysty júrgiziletinin aıta ketken jón.

Kásibı quzyrettilikke attestattaý qaǵıdalaryna sáıkes testileýden teris nátıje alǵan qatysýshylar suhbattasý kezeńine jiberilmeıdi jáne alty aıdan keıin qaıta attestattaýdan ótýge tıis.

Usynylǵan derekter attestattaýdyń túpkilikti qorytyndysy emes, birinshi kezeńniń aralyq nátıjeleri ekenin atap ótemiz. Testileý 2026 jylǵy jeltoqsan aıynyń sońyna deıin jalǵasady.

Aıta ketelik Qazaqstanda dáriger tapshylyǵy 20,4%-ǵa azaıǵany týraly jazǵan edik.