Elde «Balanyń joly» tsıfrlyq júıesi iske qosylady
ASTANA. KAZINFORM — Oqý-aǵartý mınıstrligi balalardyń qaýipsizdigine qatysty iske asyrylyp jatqan sharalarǵa túsinik berdi.
— Memleket basshysynyń tapsyrmasy boıynsha Oqý-aǵartý mınıstrligi Bala quqyqtary jónindegi ýákil jáne salalyq mınıstrliktermen birlesip, 2026–2030 jyldarǵa arnalǵan «Qazaqstan balalary» tujyrymdamasyn ázirledi. Tujyrymdamany iske asyrý aıasynda 2027 jyldan bastap eGov platformasynda «Balanyń joly» tsıfrlyq júıesi engizilip, kórsetiletin qyzmetter men qoldaýlar osy júıede biregeı túrde uıymdastyrylatyn bolady, — delingen mınıstrliktiń Kazinform agenttigine bergen jaýabynda.
Tujyrymdama aıasynda «Zań men tártip» ıdeologemasyn keńinen taratý, mektepterde pedagog-psıholog saǵatyn engizý, balalardy «Adal azamat» rýhynda tárbıeleý, zorlyq-zombylyqtan zardap shekken balalarǵa kómek kabınetterin ashý, psıhologııalyq dıagnostıkanyń biryńǵaı tsıfrlyq platformasyn qurý, qadaǵalaýdy talap etetin balalardy tálimgerlermen 100% qamtý josparlanǵan. Sondaı-aq býllıngti anyqtaý úshin beınebaqylaý kameralaryna JI tehnologııalaryn engizý, quqyqqa qaıshy kontentti joımaǵany úshin ınternet-platformalardyń jaýapkershiligin kúsheıtý jáne basqa da sharalar qarastyrylǵan.
— Zańǵa baǵynatyn azamatty tárbıeleý maqsatynda «Adal azamat» baǵdarlamasy bekitildi. Baǵdarlama aıasynda bilim berý uıymdarynda balalardyń yqtımal qaýip-qater jaǵdaılarynda qaýipsiz minez-qulyq daǵdylary men bilimderin qalyptastyrýǵa baǵyttalǵan qaýipsizdik sabaqtary ótkizilip keledi (oqý jyly bastalǵaly 1,4 mln sabaq ótkizildi). Sonymen qatar, býllıng pen zorlyq-zombylyqty erte anyqtaýdyń bekitilgen algorıtmi memlekettik organdar men Bala quqyqtary jónindegi ýákildiń jedel vedomstvoaralyq áreket etýin qamtamasyz etti (3 myń kámeletke tolmaǵan balaǵa keshendi kómek kórsetildi). Balalar quqyǵynyń buzylýyn ýaqytyly anyqtaýdyń mańyzdy tetikteriniń biri — otbasy, áıelder men balalardyń quqyqtaryn qorǵaý máseleleri boıynsha «111» memlekettik baılanys ortalyǵy. 2025 jyly atalǵan ortalyq arqyly 119 150 balaǵa quqyqtyq, uıymdastyrý jáne psıhologııalyq kómek kórsetildi. Munymen qosa, 2024 jylǵy 1 qyrkúıekten bastap elimizdegi balabaqshalarda, mektepter men kolledjderde jeke qaýipsizdik sabaqtary engizildi. Baǵdarlama aıasynda oqýshylarǵa qoǵamda jáne ınternet keńistiginde qaýipsiz minez-qulyq daǵdylaryn qalyptastyrýǵa baǵyttalǵan 130 taqyryp oqytylady, — dep atalyp ótken Oqý-aǵartý mınıstrligi aqparatynda.
Buǵan deıin «Qazaqstan balalary» tujyrymdamasy aıasynda elimizde qandaı sharalar júzege asyrylatynyn jazǵan edik.