Elde balalardy terezeden qulaýdan qorǵaýǵa baǵyttalǵan respýblıkalyq naýqany bastaldy
ASTANA. KAZINFORM — «Qazaqstan balalary» tujyrymdamasyn iske asyrý aıasynda elimizde «Tereze-SAFE» aýqymdy aqparattyq naýqan iske qosyldy, dep habarlaıdy Oqý-aǵartý mınıstrliginiń baspasóz qyzmeti.
Vedomstvo málimetinshe, bastamanyń maqsaty — jazataıym oqıǵalardyń aldyn alyp, balalardyń terezeden qulaýyna jol bermeý.
Statıstıkaǵa súıensek, 2025 jyldyń qorytyndysy boıynsha mundaı oqıǵalar 2023 jylmen salystyrǵanda 1,8 esege artqan. Qaýip tobynda negizinen 2 men 5 jas aralyǵyndaǵy búldirshinder tur.
Naýqannyń negizgi elementi — ár otbasynyń kúndelikti ómirine «Qaýipsizdik mınýty» erejesin engizý. Erejege sáıkes ata-analar kún saıyn úı ishin qysqasha tekserip shyǵý ádetin qalyptastyrýy kerek. Tekserý kezinde tereze buǵattaǵyshtarynyń beriktigine jáne tereze aldynda bala shyǵyp ketetin jıhazdyń turmaýyna basa nazar aýdarý qajet. Basty maqsat —árbir ata-ananyń boıynda turmystyq qaýipsizdik daǵdysyn qalyptastyrý.
Naýqan aıasynda óńirlerde atqarylatyn is-sharalar:
Bilim berý salasynda:
Mektepter men balabaqshalarda «Qaýipsiz úı» taqyrybynda sabaqtar men arnaıy mamandardyń qatysýymen ata-analar jınalysy ótkiziledi.
Turǵyn úı sektorynda:
Úı basqarýshylarymen jáne belsendi turǵyndarmen birlesip, terezelerge arnaıy qulyptar ornatý jáne qaýipsizdik erejeleri jazylǵan aqparattyq paraqshalardy taratý jumystary uıymdastyrylady.
Densaýlyq saqtaý salasynda:
Jańa týǵan nárestelerdi patronajdyq tekserý kezinde medıtsına qyzmetkerleri úı ishine shaǵyn «qaýipsizdik aýdıtin» júrgizip, ata-analarǵa naqty keńester beredi.
Naýqan memlekettik organdardyń, úkimettik emes uıymdardyń, jurtshylyq pen BAQ-tyń tyǵyz yntymaqtastyǵy arqyly júzege asady.
— Birlesken kúsh-jiger eresekterdiń bala ómirine degen jaýapkershiligin arttyryp, ár úıde qaýipsiz orta qurýǵa baǵyttalǵan. Bul jumys elimizdiń barlyq óńirinde balalar qaýipsizdiginiń biryńǵaı standarttaryn qalyptastyrýǵa jáne jaraqat alý qaýpin júıeli túrde azaıtýǵa múmkindik beredi, — delingen habarlamada.
Osyǵan deıin Petropavlda eki jasar bala terezeden qulap ketkenin jazǵan edik.
