Elde balalar densaýlyǵyn saqtaýǵa bólinetin qarjy eki ese ósti
ASTANA. KAZINFORM – Sońǵy bes jyldyń ishinde balalar densaýlyǵyn saqtaý salasyn qarjylandyrý 264 mlrd teńgeden 585 mlrd teńgege deıin eki eseden astam artty. Bul týraly DSM baspasóz qyzmeti habarlady.
Búginde elde shamamen 7 mıllıon bala ómir súredi, bul el halqynyń shamamen 34%-y. Sońǵy on jyldyń ishinde balalardyń sany 1,5 mıllıon adamǵa artty, bul balalarǵa arnalǵan medıtsınalyq kómektiń ınfraqurylymyn ári qaraı damytý men júıesin jetildirýdi talap etedi.
Balalardyń densaýlyǵyn saqtaý memlekettik saıasattyń negizgi basymdyqtarynyń biri bolyp qala beredi. Balalarǵa medıtsınalyq kómek tegin medıtsınalyq kómektiń kepildik berilgen kólemi jáne mindetti áleýmettik medıtsınalyq saqtandyrý júıesi sheńberinde tegin kórsetiledi.
Sońǵy bes jyldyń ishinde balalar densaýlyǵyn saqtaý salasyn qarjylandyrý 264 mlrd teńgeden 585 mlrd teńgege deıin eki eseden astam artty. Búginde balalarǵa kórsetiletin medıtsınalyq kómektiń shyǵyny sala bıýdjetiniń 23%-yn quraıdy.
— Búginde Qazaqstannyń árbir úshinshi turǵyny — bala. Bizdiń mindetimiz tek qoljetimdi medıtsınalyq kómekti qamtamasyz etý ǵana emes, sonymen qatar balanyń ómiriniń alǵashqy kúnderinen bastap onyń deni saý ári qaýipsiz damýyna jaǵdaı jasaý. Biz pedıatrııalyq qyzmetti kezeń-kezeńimen nyǵaıtyp, joǵary tehnologııalyq kómekti damytyp, profılaktıkalyq baǵdarlamalardy keńeıtip, balalar medıtsınasynyń ınfraqurylymyn jańǵyrtyp kelemiz. Densaýlyq saqtaý salasyndaǵy barlyq sheshim eń aldymen balalardyń densaýlyǵy men ál-aýqatyna baǵyttalýy tıis, — dedi Densaýlyq saqtaý mınıstri Aqmaral Álnazarova.
Elde balalarǵa medıtsınalyq kómektiń kópdeńgeıli júıesi jumys isteıdi. Oǵan emhanalar, balalar aýrýhanalary, perınataldyq ortalyqtar jáne respýblıkalyq klınıkalar kiredi. El emhanalarynda 370 pedıatrııalyq bólimshe jáne 386 damý men erte aralasý ortalyqtary ashylǵan.
Aldyn alý jáne aýrýlardy erte anyqtaýǵa erekshe kóńil bólinedi. Patronajdyq baqylaý júıesi júkti áıelderdi bosanýǵa deıingi qadaǵalaýdy jáne bes jasqa deıingi balalardy turaqty súıemeldeýdi qamtıdy. Búginde alǵashqy býyn deńgeıinde shamamen 4 myń patronajdyq meıirger jumys isteıdi.
Balalarǵa arnalǵan medıtsınalyq ınfraqurylymdy jańǵyrtý jalǵasyp jatyr. 25 balalar aýrýhanasyn renovatsııalaý baǵdarlamasy iske asyrylýda, zamanaýı perınataldyq ortalyqtar salynyp jatyr.
Balalarǵa joǵary tehnologııalyq medıtsınalyq kómekti damytý da basym baǵyttardyń biri bolyp otyr. Sońǵy eki jyldyń ishinde 36 balaǵa «Gamma-pyshaq» keshenin paıdalana otyryp radıohırýrgııalyq operatsııa jasaldy. Jyl saıyn shamamen 400 balaǵa estý ımplanttary ornatylady, 700-ge jýyq shala týǵan náreste retınopatııadan em alady, 2 myńnan astam balaǵa kardıohırýrgııalyq kómek kórsetiledi.
Balalar hırýrgııasy men neonataldyq kómekti damytý júıeli túrde jalǵasyp jatyr. Jyl saıyn týa bitken damý kemistikteri bar shamamen 1500 nárestege operatsııa jasalady, olardyń 40%-ǵa jýyǵy az ınvazıvti endovıdeohırýrgııalyq ádistermen oryndalady.
Elde zamanaýı perınataldyq tehnologııalar engizilip, neonataldyq reanımatsııa damýda jáne medıtsınalyq kómekti óńirlendirý júıesi jetildirilýde. Osy sharalardyń arqasynda hırýrgııalyq aralasýdan keıin nárestelerdiń ómir súrý kórsetkishi 88%-dan 93%-ǵa deıin artty.
Aıta ketelik Almatyda balalar merekesine oraı tegin medıtsınalyq tekserýler men aktsııalar ótip jatyr.
