Elde balaqbaqshamen qamtý deńgeıi qandaı
ASTANA. KAZINFORM — 2-6 jas aralyǵyndaǵy balalardy balabaqshamen qamtý deńgeıi 95,9 paıyzǵa jetti. Bul týraly QR Oqý-aǵartý birinshi vıtse-mınıstri Maıra Meldebekova málim etti.
- Keıingi 5 jylda elimizdegi mektepke deıingi uıymdardyń sany 10 650-den 12 myńǵa (11 909) jýyqtady. Memleket basshysynyń tapsyrmasyna sáıkes, óńirlermen balabaqshalardy iske qosý jónindegi 2023-2027 jyldarǵa arnalǵan qadamdyq jospar iske asyrylyp otyr. 2023 jyldan beri 182 myń jańa oryn ashyldy (60,7%). Bul uıymdarda 1 mıllıonnan astam bala tárbıelenip jatyr. Kezektegi 2-6 jas aralyǵyndaǵy balalardy balabaqshamen qamtý deńgeıi 95,9 paıyzǵa jetti, - dedi M. Meldebekova Ortalyq kommýnıkatsııalar qyzmetindegi baspasóz máslıhatynda.
Sonymen qatar ol mektepke deıingi bilim berý salasynda qyzmet sapasyn jáne ashyqtyqty arttyrý maqsatynda 2024 jyldan bastap vaýcherlik qarjylandyrý pılottyq jobasy iske qosylǵanyn eske saldy.
- Búginde pılottyq jobaǵa 20 qala, 16 aýdan qosyldy. Qazirgi tańda vaýcherlik qarjylandyrý arqyly 5 231 balabaqshaǵa 726 myń vaýcher berildi. Nátıjesinde, jyl basynan beri 21 mlrd teńge bıýdjet qarajaty únemdelip, jańa vaýcherlerdi qarjylandyrýǵa maqsatty túrde baǵyttaldy. Bul qadam kezektilikti 44%-ǵa qysqartýǵa múmkindik berdi. Vaýcherlik júıe protsesteriniń ashyqtyǵyn qamtamasyz etýge yqpal etti. Jańa júıe «aqsha balamen birge júredi» prıntsıpi boıynsha jumys isteıdi. Ata-analarǵa tańdaýdy ózderi jasaýǵa jáne balabaqshany aýystyrýǵa múmkindik berildi, - dedi vıtse-mınıstr.
Eske salsaq, bıyl tamyz aıynda jarty mıllıonnan astam bala balabaqshalarǵa vaýcher alǵanyn jazǵan edik.