Elde balabaqsha oryndaryn bólýdiń jańa júıesi engizildi
ASTANA. KAZINFORM — Memleket basshysy Qasym-Jomart Toqaevtyń tapsyrmasy boıynsha Oqý-aǵartý mınıstrligi memlekettik qyzmetter kórsetý men memlekettik bilim berý tapsyrysyn ornalastyrýdyń jańa mehanızmin ázirledi.
Buǵan deıin balabaqsha oryndaryna kezektiń vertıkaldy qaǵıdatpen qalyptasýy, memlekettik tapsyrystyń naqty bir mektepke deıingi uıymǵa bekitilýi jáne qarjylandyrýdyń naqty qajettilikke saı bólinbeýi birqatar máseleni týyndatty. Olardyń qatarynda jalǵan kontıngentti tirkeý, balabaqshalar arasyndaǵy básekelestiktiń shektelýi jáne bıýdjet qarajatynyń tıimsiz paıdalanylýy bar.
Jańa mehanızm aıasynda derekterdiń durystyǵyn tekserip, buzýshylyqtardy anyqtaıtyn táýekelderdi basqarý júıesi engizildi. Bul sybaılas jemqorlyq táýekelderin barynsha azaıtýǵa jáne memlekettik bilim berý tapsyrysyn bólýdiń obektıvtiligin qamtamasyz etýge múmkindik beredi.
Qazirgi tańda vaýcherlik qarjylandyrý boıynsha pılottyq joba 20 qala men 23 aýdanda iske asyrylýda. Oǵan 6 myńǵa jýyq mektepke deıingi uıym qatysyp jatyr. Joba aıasynda 1 mıllıonnan astam vaýcher berildi.
Jańa mehanızmdi iske asyrý nátıjesinde mektepke deıingi tárbıemen qamtylǵan balalar sany artty. Sonymen qatar kezekte turǵan 2-6 jastaǵy balalar sany 160 myńnan 23 myńǵa deıin qysqardy.
Pılottyq joba aıasynda 35 mlrd teńgeden astam bıýdjet qarajaty únemdeldi. Únemdelgen qarajat esebinen qosymsha vaýcherler berilýde.
Jańa model memlekettik kórsetiletin qyzmetterdiń ashyqtyǵyn qamtamasyz etýge, bıýdjet qarajatyn tıimdi paıdalanýǵa, sondaı-aq bilim berý qyzmetteriniń sapasy men mektepke deıingi uıymdardyń básekege qabilettiligin arttyrýǵa múmkindik berip otyr.
Aıta ketelik balabaqsha vaýcherin ýaqytynda rastamaǵandar kezekten aıyrylýy múmkin.
