Elde avıatsııalyq otyn óndirý qanshalyqty artty
ASTANA. KAZINFORM — Qazirgi ýaqytta otandyq munaı óńdeý zaýyttary ishki naryqty benzınmen, dızel otynymen jáne avıatsııalyq otynmen tolyq kólemde qamtamasyz etip otyr ma? Bul suraqqa Energetıka mınıstrligi jaýap berdi.
- Іshki naryqtyń avıatsııalyq otynǵa degen qajettiligi de jumys istep turǵan munaı óńdeý zaýyttarynyń resýrstary esebinen qamtamasyz etiledi. 2026 jyly otandyq zaýyttarda shamamen 825 myń tonna avıatsııalyq otyn óndirý josparlanǵan, - delingen mınıstrliktiń Kazinform agenttigine bergen jaýabynda.
Vedomstvo aqparatyna qaraǵanda, otandyq munaı óńdeý zaýyttary óndiristik múmkindikteri men naryq suranysyna sáıkes ishki naryqty munaı ónimderiniń negizgi túrlerimen qamtamasyz etedi. 2026 jyldyń birinshi toqsanynyń qorytyndysy boıynsha Qazaqstanda 3,7 mln tonna munaı ónimi óndirildi. Onyń ishinde 1,6 mln tonna benzın jáne shamamen 1,5 mln tonna dızel otyny bar.
- Qajetti janar-jaǵarmaı materıaldarynyń qory qalyptastyryldy, - dep atalyp ótken Energetıka mınıstrligi málimetinde.
Buǵan deıin qazaqstandyq munaı óńdeý zaýyttary jyl saıyn shamamen 750 myń tonna avıatsııalyq otyn óndiretini habarlandy. Bul kólem ishki naryqtyń suranysyn tolyq jabady. https://kaz.inform.kz/news/kazakstan-sheteldk-aviaotinga-taueld-me-ministrlk-zhauabi-2de128a0
Azamattyq avıatsııa komıtetiniń málimetinshe, 2026 jyly avıaotynǵa degen jalpy qajettilik 1,2 mln tonnaǵa baǵalanyp otyr. https://kaz.inform.kz/news/kazakstan-sheteldk-aviaotinga-taueld-me-ministrlk-zhauabi-2de128a0
Onyń ishinde shamamen 680 myń tonnasy ishki naryqqa qajet bolsa, taǵy 520 myń tonnasy tranzıttik jáne júk áýe tasymaldaryna qyzmet kórsetý úshin qajet.
Qazaqstandyq munaı óńdeý zaýyttary otandyq azamattyq avıatsııanyń qajettiligin tolyq qamtamasyz etetindikten, qosymsha ımport negizinen Astana men Almaty áýejaılary arqyly ótetin halyqaralyq tranzıttik reısterge qyzmet kórsetý úshin qajet.
Eske salsaq, bıyl maýsym aıynda Parlament palatalarynyń birlesken otyrysynda Memleket basshysy Qasym-Jomart Toqaev avıaotynǵa qatysty máselelerdi tolyq sheshýge múmkindik beretin myqty ınfraqurylym qalyptastyrýdy tapsyrdy.
