Elde avıakerosınniń tapshylyǵyn joıý máselesi qashan tolyq sheshiledi
ASTANA. KAZINFORM – Elde otynnyń sapasy da K4-ten K5 klasyna deıin kóteriledi. Bul týraly Úkimet otyrysynda Energetıka vıtse-mınıstri Qaıyrhan Tutqyshbaev málim etti.
- Munaı óńdeý ónerkásibin damytý tujyrymdamasyna sáıkes, elimizdiń negizgi munaı óńdeý zaýyttarynda qýattylyqtardy keńeıtý jáne óńdeý merzimin 1-den 3 jylǵa deıin ulǵaıtý jobalary arqyly QazMunaıGaz kompanııasy munaı óńdeýdi jylyna 18,4-ten 27,7 mln tonnaǵa deıin ulǵaıtý boıynsha jumysty jalǵastyryp jatyr. Munaı óńdeý zaýyttaryn keńeıtý jobalary avtokólik benzıniniń boljamdy óndirisin jylyna 5,6-dan 9 mln tonnaǵa deıin, avıakerosındi 0,7-den 1,7 mln tonnaǵa deıin, dızel otynyn 6,2-den 9,5 mln tonnaǵa deıin arttyrýǵa múmkindik beredi, - dedi Qaıyrhan Tutqyshbaev.
Sonymen birge, Memleket basshysynyń tapsyrmasyn iske asyrý aıasynda 2026 – 2033 jyldarǵa qýattylyǵy jylyna 10 mln tonna bolatyn jańa munaı óńdeý zaýytynyń tehnıkalyq-ekonomıkalyq negizdemesin ázirleý, jobalaý, salý jáne iske qosý josparlanǵan. Bul elimizdiń munaı óńdeý qýatyn jylyna 40 mln tonnaǵa deıin jetkizýge múmkindik beredi.
- Búginde Mınıstrlik jobanyń úılestirýshisi retinde jańa munaı óńdeý zaýytyna shıkizat kózderi men ónim jelisi boıynsha bastapqy derekterdi suranys boljamdary men janar-jaǵarmaı ótkizýdiń áleýetti naryqtaryna baılanysty daıyndaýdy bastady. Bolashaqta bul zaýyttyń konfıgýratsııasyn, tehnologııa lıtsenzıaryn jáne jańa munaı óńdeý zaýytynyń ornalasý jerin tańdaýǵa múmkindik beredi. Keshendi jumys ýaqytty qajet etedi, sáıkesinshe zertteý nátıjeleri qosymsha birneshe aı aralyǵynda usynylatyn bolady. Keńeıtý jobalaryn iske asyrý jáne jańa munaı óńdeý zaýytyn salý ishki naryqtaǵy munaı ónimderiniń tapshylyǵyn kezeń-kezeńimen qysqartýǵa múmkindik beredi, - dedi vıtse-mınıstr.
Onyń aıtýynsha, 2028 – 2030 jyldary 3 munaı óńdeý zaýytynyń kómegimen avıakerosınniń tapshylyǵy jylyna 500-den 300 myń tonnaǵa deıin qysqarady jáne dızel otynynyń tapshylyǵy joıylady.
- 2033 jyly tórtinshi munaı óńdeý zaýyty esebimen avıakerosınniń tapshylyǵyn joıý jáne kórshiles elderge dızel otyny men benzındi eksporttaý josparlanǵan. Qoldanystaǵy munaı óńdeý zaýyttarynda munaı óńdeý tereńdigi 89%-dan 94%-ǵa artady, al jańa zaýytta 95%-dy quraıdy, otynnyń sapasy da K4-ten K5 klasyna deıin kóteriledi, - dep naqtylady ol.
Buǵan deıin tórtinshi munaı óńdeý zaýyty naqty salynatyny málim boldy.