Elde aýyl sharýashylyǵy tehnıkasyn jańartý qarqyny qalaı

ASTANA. KAZINFORM — Bir jylda aýyl sharýashylyǵy tehnıkasyn shyǵarý 22%-ǵa ósti. Bul týraly Úkimet otyrysynda Aýyl sharýashylyǵy mınıstri Aıdarbek Saparov málim etti. 

— Búginde óńirlerdiń málimeti boıynsha tehnıkanyń daıyndyq deńgeıi shamamen 80%, jappaı egis jumystary bastalǵanǵa deıin tehnıka 100% daıyn bolady. Ákimdikterge tehnıkany jóndeý jumystaryn kúsheıtip, mashına-traktor sheberhanalarynyń tıisti jumys isteýin qamtamasyz etý qajet, — dedi Aıdarbek Saparov.

Onyń aıtýynsha, 2025 jyldyń qorytyndysy boıynsha memlekettik qoldaý sharalarynyń arqasynda sharýalar shamamen 25 myń birlik tehnıka satyp alyp, aýyl sharýashylyǵy tehnıkasy parkin jańartý deńgeıi 6,5%-ǵa deıin jetti. Bul joǵary ónimdilik esebinen egis naýqanyn ońtaıly agrotehnıkalyq merzimde júrgizýge jáne egistiń sapasyn arttyrýǵa múmkindik beredi. Sonymen qatar, tehnıkanyń jumys kezinde toqtap qalmaýy úshin, elde 70-ten astam servıstik ortalyq jumys isteıdi.

— Memlekettik qoldaý sharalary fermerler tarapynan suranystyń artýyna yqpal etti, bul óz kezeginde otandyq tehnıkany óndirý kólemin ulǵaıtýǵa múmkindik berdi. Atap aıtqanda, bir jyldyń ishinde tehnıka óndirisi 22%-ǵa ósti. Bıyl mashına-traktor parkin jańartý deńgeıin 8%-ǵa deıin jetkizý tapsyrmasyn oryndaý maqsatynda, óndiris kólemin 9,9 myńǵa jetkizý josparlanǵan. Jalpy, aýyl sharýashylyǵy quralymdarynda 139 myń traktor, shamamen 5,6 myń joǵary ónimdi egis kesheni, 70 myń sepkish, 141 myń topyraq óńdeý quraly bar, — dedi mınıstr.

Budan buryn habarlanǵandaı, bıyl jalpy egis alańy shamamen 23,8 mln gektar boldy.