Elde aýyl sharýashylyǵy sanaǵy bastaldy
ASTANA. KAZINFORM — Búginnen bastap Qazaqstanda Ulttyq aýyl sharýashylyǵy sanaǵy bastaldy. Sanaq kezinde jınalǵan derekter elimizdegi aýyl sharýashylyǵynyń qazirgi jaǵdaıyn, onyń qalaı damyp kele jatqanyn, ondaǵy halyqtyń turmysyn kórsetedi.
Alǵashqy onlaın-kezeń 31 tamyzǵa deıin jalǵasady. Qatysý úshin sanaq.gov.kz saıtynda ETsQ, SMS-kod nemese eGovMobile qosymshasyndaǵy QR-kod arqyly júıege kirýge bolady.
Saıtta eki túrli saýalnama qoljetimdi: bireýi — agrokásiporyndarǵa, ekinshisi — baý-baqshasy bar ne mal ustaıtyn úı sharýashylyqtaryna arnalǵan. Suraqtar aýyl sharýashylyǵy qyzmetiniń barlyq tusyn qamtıdy: jer men tehnıkany paıdalaný, eńbek resýrstary, aýyl sharýashylyq ónimin ótkizý jáne t. b.
— Saıtta saýalnamany qalaı toltyrý kerektigi týraly beınenusqaýlyq, ınteraktıvti kómekshi jáne naqty ýaqyt rejıminde suraqtarǵa jaýap beretin SANAQ myrza chat-boty jumys isteıdi.
Internetke qosylmaǵan azamattar úshin elimiz boıynsha ákimdikter men aýdandyq statıstıka bólimderinde 2684 ózine-ózi qyzmet kórsetý pýnkti ashylǵan. Sondaı-aq 1446 nómirindegi baılanys ortalyǵy táýlik boıy jumys isteıdi jáne tehnıkalyq suraqtardan bastap saýalnamanyń mazmunyna deıin kez kelgen másele boıynsha keńes berýge daıyn, — delingen Ulttyq statıstıka bıýrosy habarlamasynda.
Ulttyq statıstıka bıýrosy aýyl sharýashylyǵy sanaǵyna qatysýshylar usynǵan barlyq derektiń zańmen qorǵalatynyn jáne salyq organdaryna, polıtsııaǵa nemese basqa memlekettik mekemelerge berilmeıtinin habarlaıdy.
Aıta ketelik 300 myńnan astam sharýashylyqtyń mekenjaıy naqtylanǵan edi.