Elde arnaıy pedagog tapshylyǵy bar ma
ASTANA. KAZINFORM — Eldegi múmkindigi shekteýli balalardyń 90%-y arnaıy psıhologııalyq-pedagogıkalyq qoldaýmen qamtylǵan. Bul týraly Oqý-aǵartý mınıstrligi málim etti.
- Mekteptermen qatar arnaıy psıhologııalyq-pedagogıkalyq qoldaý qyzmetterin arnaıy bilim berý uıymdary usynady. Búginde elimizde 238 psıhologııalyq-pedagogıkalyq túzetý kabıneti, 12 aýtızm ortalyǵy, 14 ońaltý ortalyǵy jumys istep jatyr. Jalpy, múmkindigi shekteýli balalardyń 90%-y arnaıy psıhologııalyq-pedagogıkalyq qoldaýmen qamtylǵan, - delingen mınıstrliktiń Kazinform agenttigine bergen jaýabynda.
Ulttyq bilim berý derekter qory málimetine qaraǵanda, bilim berý uıymdarynda 11 myńnan astam arnaıy pedagog jumys istep jatyr. Bul turǵyda áli de 2,3 myń pedagog qajet (2024 jyly - 3,5 myń).
- Mamandardy daıarlaý 17 joǵary oqý ornynda júzege asyrylyp keledi. Jyl saıyn arnaıy pedagogterdi daıarlaýǵa arnalǵan memlekettik granttar sany artyp keledi. Máselen, 2024 jyly - 656 grant, 2025 jyly 819 grant bólindi. Búginde zańnamany jetildirý aıasynda «Mektepke deıingi tárbıe men oqytý», «Bastaýysh oqytý pedagogıkasy men ádistemesi», «Pedagog-psıholog» baǵyttary boıynsha pedagogıkalyq bilimi bar mamandardy «Arnaıy pedagogıka» deńgeıinde pedagogıkalyq qaıta daıarlaý múmkindigin kózdeıtin normany engizý qarastyrylyp jatyr, - dep atalyp ótken vedomstvo aqparatynda.
Atap aıtqanda, kadrlarmen qamtamasyz etýdi qosa alǵanda, ınklıýzıvti bilim berý úshin jaǵdaı jasaý jónindegi nysanaly ındıkatorlar 2023-2029 jyldarǵa arnalǵan bilim berýdi damytý, 2025-2030 jyldarǵa arnalǵan ınklıýzıvti saıasat, 2026-2030 jyldarǵa arnalǵan «Qazaqstan balalary» tujyrymdamalarynda eskerilgen.
Buǵan deıin habarlanǵandaı, Qazaqstanda alǵash ret Inklıýzıvti bilim berý jónindegi álemdik kongress ótti.