Elde ár kásipkerdiń tsıfrlyq profıli jasalady
ASTANA. KAZINFORM — Qazaqstanda bıznestiń biryńǵaı tsıfrlyq ekojúıesin qurý aıasynda ár kásipkerdiń tsıfrlyq profıli qalyptastyrylady. Bul týraly Úkimet otyrysynda Ulttyq ekonomıka vıtse-mınıstri Bekbolat Moldabekov aıtyp berdi.
Vıtse-mınıstrdiń aıtýynsha, qoldanystaǵy Kásipkerlik sýbektileriniń tizilimin jańa tsıfrlyq platformanyń negizine aınaldyrý josparlanyp otyr.
— Jańa júıeni nólden qurýdyń ornyna Kásipkerlik sýbektileriniń tizilimin damytyp, ony biryńǵaı tsıfrlyq platformanyń ózegine aınaldyrý usynylady. Bul platformada memlekettik derekter, bıznestiń tsıfrlyq profıli, analıtıkalyq servıster, jasandy ıntellekt quraldary jáne memlekettik qoldaý sharalaryn usyný protsesteri biriktiriledi. Іs júzinde memleket, bıznes jáne memlekettik qoldaý operatorlary úshin biryńǵaı tsıfrlyq ekojúıe qalyptasady, — dedi vıtse-mınıstr.
Qazirgi tańda Kásipkerlik sýbektileriniń tizilimi kásipkerler týraly málimetterdi jınaý jáne júrgizý fýnktsııasyn atqarady. Alaıda júıeniń qazirgi múmkindikteri zamanaýı mindetterdi tolyq sheshýge jetkiliksiz.
Atap aıtqanda, kásipker týraly aqparat túrli memlekettik aqparattyq júıelerde shashyrańqy ornalasqan. Sonyń saldarynan kásipkerdiń biryńǵaı tsıfrlyq profıli joq, al salalar men óńirler boıynsha taldaý júrgizý múmkindigi shekteýli.
Jańa platforma Kásipkerlik sýbektileriniń tizilimin memlekettik aqparattyq júıelermen, qarjy operatorlarymen jáne ózge de tsıfrlyq servıstermen biriktiredi. Nátıjesinde árbir kásipkerlik sýbektisiniń biryńǵaı tsıfrlyq profıli jasalady. Onda bıznes týraly negizgi derekter, memlekettik qoldaý alý tarıhy jáne ózge de aqparattar jınaqtalady.
Mınıstrlik málimetinshe, jańa júıe tek aqparattyq baza ǵana emes, memlekettik qoldaý sharalaryn usyný, ótinimderdi qabyldaý jáne olardyń tıimdiligin baǵalaý alańyna aınalady. Sondaı-aq tsıfrlyq karta arqyly kásiporyndardyń qarjylyq jaǵdaıyn, damý áleýetin jáne táýekel deńgeıin eskere otyryp, memlekettik qoldaý sharalaryn nysanaly túrde usyný múmkindigi paıda bolady.
— Memlekettik organdar ekonomıkalyq kórsetkishterdi naqty ýaqyt rejıminde baqylap, salyq reformalary men basqa da sheshimderdiń bızneske áserin baǵalaı alady. Sheshimder jekelegen statıstıkalyq málimetterge emes, keshendi analıtıka men obektıvti derekterge negizdeledi. Nátıjesinde bytyrańqy aqparattyq júıelerdiń ornyna bıznesti qoldaýdyń biryńǵaı tsıfrlyq ekojúıesi qalyptasyp, memlekettik qoldaý sharalarynyń ashyqtyǵy men tıimdiligi artady, — dedi Bekbolat Moldabekov.
Aıta keteıik, kásipkerlerge arnalǵan 150 memlekettik qoldaý sharasy onlaın formatqa kóshiriledi.
