Elde apatty jaǵdaıdaǵy úılerdiń kóbi qaı óńirde

ASTANA. KAZINFORM — Qazaqstan aýmaǵynda apatty jaǵdaıdaǵy úılerdiń sany qansha jáne olar kóbine qaı óńirlerde? Bul suraqqa Ónerkásip jáne qurylys mınıstrligi jaýap berdi. 

— Qazir jergilikti atqarýshy organdardyń aqparaty boıynsha eldegi apatty jaǵdaıdaǵy úılerdiń sany 1031 kóppáterli turǵyn úı, — delingen mınıstrliktiń Kazinform agenttigine bergen jaýabynda.

Bul turǵyda apatatty úılerdiń kóbi eki qala men bir oblysta kóp tirkelgen.

— Eń kóbi Atyraý oblysyda — 217 kóppáterli apatty turǵyn úı, kelesi orynda Astana qalasy tur — 206 kóppáterli turǵyn úı tirkelgen jáne Shymkent qalasynda 108 kóppáterli úı bar, — dep atalyp ótken vedomstvo aqparatynda.

Mınıstrlik aqparatyna qaraǵanda, Memleket basshysynyń tapsyrmasyna sáıkes, 2029 jylǵa deıin óńirlerge apatty jáne eski turǵyn úı qorynyń 40 myńǵa jýyq menshik ıelerin jańa turǵyn úımen qamtamasyz etý qajet. QR Úkimetiniń 2022 jylǵy 23 qyrkúıektegi № 736 qaýlysyna sáıkes, 2023-2029 jyldarǵa arnalǵan turǵyn úı-kommýnaldyq ınfraqurylymdy damytý tujyrymdamasy bekitildi, onyń aıasynda óńirlerde jóndeý baǵdarlamalary iske asyrylyp jatyr. Tujyrymdamany iske asyrý jónindegi jumysty kúsheıtý, apatty jáne eski turǵyn úı qorynyń menshik ıelerin turǵyn úımen qamtamasyz etý qarqynyn jedeldetý jóninde túbegeıli sharalarmen jergilikti atqarýshy organdar aınalysady.

Buǵan deıin Astanada apatty turǵyn úılerdi buzý jumystary 2028 jylǵa deıin aıaqtalýy tıis ekenin jazǵan edik.