Elde altyn óndirý kólemi tómendedi
ASTANA. KAZINFORM – Úsh aıda óńdeý ónerkásibi 8,5 paıyzǵa ósti. Bul týraly Úkimet otyrysynda 3 aıdyń áleýmettik-ekonomıkalyq damý qorytyndysyn talqylaý kezinde Ónerkásip jáne qurylys mınıstri Ersaıyn Naǵaspaev málim etti.
- Úsh aıdyń qorytyndysy boıynsha óńdeý ónerkásibi 8,5 paıyzǵa ósip, oń dınamıka baıqaldy. Óndiristik kórsetkishter mashına jasaý, hımııa ónerkásibi, qurylys materıaldary, rezeńke jáne plastmassa buıymdary óndirisi, jeńil ónerkásipte jáne basqa da salalarda ósti. Metallýrgııada óndiris kólemi altyn, myrysh, bolat jáne ferroqorytpa óndirisiniń tómendeýine baılanysty 6,3 paıyzǵa azaıdy. Kásiporyndarda josparly jóndeý jumystaryn júrgizý, ken sapasynyń tómendeýi, jáne elektr energııasynyń qymbattaýy sııaqty birqatar sebepterge baılanysty teris dınamıka qalyptasyp otyr, - dedi E. Naǵaspaev.
Saladaǵy josparlanǵan kórsetkishter qoldanystaǵy qýattardy ulǵaıtý jáne jańa óndiristerdi iske qosý esebinen qamtamasyz etiletin bolady.
- Mashına jasaý salasy 21,9 paıyz deńgeıinde ósim kórsetti. Salada kólik quraldaryn, aýyl sharýashylyǵy jáne temir jol tehnıkasyn, sondaı-aq turmystyq tehnıkany óndirý kólemi artty. Kórsetkishterdiń ósýi ishki suranystyń artýy men ınvestıtsııalyq jobalardyń belsendi iske asyrylýy esebinen júzege asty. Jeńil ónerkásipte toqyma buıymdar, kıim jáne bylǵary ónimder óndirisi artyp, saladaǵy ósim 51,1 paıyzdy qurady. Qurylys materıaldary óndirisi beton, qurylys eritindileri, ák, otqa tózimdi buıymdar, tsement jáne beton konstrýktsııalary kóleminiń ósýine baılanysty 37,1 paıyzǵa artty. Hımııa ónerkásibinde azot tyńaıtqysh jáne sary fosfor óndirisiniń artýyna baılanysty 2,4 paıyzǵa ósim baıqalyp otyr, - dedi mınıstr.
Budan buryn habarlanǵandaı, kúrdeli syrtqy ekonomıkalyq ahýalǵa qaramastan shıkizattyq emes sektor básekege qabilettiligin kórsetti.