Elde altyn qanshadan saýdalanyp jatyr

ASTANA. KAZINFORM — Qazaqstanda altynnyń bir grammy 81 774,20 teńgege deıin arzandady.

Ulttyq banktiń málimetine sáıkes, 12 naýryz tańerteńgi jaǵdaı boıynsha bir gramm altynnyń baǵasy 82 542,16 teńge.

Ótken aptada baǵaly metaldyń bir gramy 84 355,16 teńge bolǵan.

Taıaý Shyǵystaǵy jaǵdaıdyń ýshyǵýy altyn baǵasyna áser etti. AQSh pen Izraıldiń Iranǵa soqqy jasaýynan keıin ınvestorlar qaýipsiz aktıv sanalatyn altynǵa kóbirek nazar aýdara bastady.

Naryq derekteri boıynsha, 2 naýryzda altynnyń spot baǵasy 0,4 paıyzǵa ósip, bir ýntsııasy 5297,31 dollarǵa jetti. Keıin ınvestorlar paıdasyn tirkegendikten baǵa azdap tómendedi. Al 29 qańtarda altyn quny bir ýntsııasy úshin 5594,82 dollarǵa jetip, rekordtyq deńgeıge shyqqan edi.

Buǵan deıin habarlanǵandaı, álemdik altyn baǵasynyń ósýine baılanysty Qazaqstan altyn satyp alý kólemi boıynsha dúnıejúzinde ekinshi orynǵa shyqty. 2025 jyly el 57 tonna altyn satyp alyp, osy kórsetkish boıynsha álemde ekinshi boldy.

Sonymen qatar sońǵy alty jyl ishinde Qazaqstan iri altyn satýshylar qatarynda da boldy. Osy kezeńde altyn qorynyń taza qysqarýy 44,4 tonna boldy.

2022–2024 jyldary Qazaqstan Ulttyq Banki rezervterdiń ótimdiligin qoldaý jáne ártaraptandyrý maqsatynda 118,3 tonna altyn satty. Al 2025 jyly rekordtyq baǵa men geosaıası turaqsyzdyq jaǵdaıynda el qaıtadan altyn qoryn jınaqtaýǵa kóshti.