Elde allergııaǵa qarsy ınnovatsııalyq dári synaqtan ótip jatyr
ASTANA. KAZINFORM – Densaýlyq saqtaý mınıstrligi eldegi maýsymdyq allergııanyń eń keń taralǵan sebepteriniń biri – jýsan tozańyna allergııany emdeýge arnalǵan otandyq preparattyń klınıkalyq zertteýiniń II kezeńin bastady.
Joba Densaýlyq saqtaý mınıstrliginiń 2024–2026 jyldarǵa arnalǵan ǵylymı-tehnıkalyq baǵdarlamasy sheńberinde júzege asyrylýda. Negizgi maqsat – allergııany emdeýdi patsıentter úshin qoljetimdi ári yńǵaıly etetin qazaqstandyq preparat ázirleý.
Mamandardyń málimetinshe, jýsan tozańyna allergııa Qazaqstandaǵy eń jıi kezdesetin maýsymdyq allergııalardyń biri bolyp tabylady. Ásirese jaz jáne kúz mezgilderinde adamdar murynnan sý aǵý, túshkirý, kózden jas aǵý jáne tynys alýdyń qıyndaýy sııaqty belgilerge jıi tap bolady.
Jańa preparatty zamanaýı rekombınantty allergen negizinde qazaqstandyq ǵalymdar ázirlegen. Óndiris halyqaralyq GMP standarttaryna sáıkes otandyq OtarBioPharm kásipornynda júzege asyrylady.
Ázirlemeniń basty artyqshylyqtarynyń biri – emdeý kýrsynyń qysqalyǵy. Dástúrli allergen-spetsıfıkalyq terapııa uzaq ýaqytqa sozylýy múmkin bolsa, jańa preparat aptalyq aralyqpen bar bolǵany tórt teriasty ınektsııasyn engizýdi kózdeıdi.
Buǵan deıin eriktilerdiń qatysýymen klınıkalyq zertteýlerdiń birinshi kezeńi aıaqtalǵan bolatyn. Zertteýshilerdiń málimetinshe, eleýli janama áserler tirkelmegen, al aldyn ala nátıjeler allergenge sezimtaldyqtyń tómendegenin kórsetken.
2026 jylǵy 24 sáýirde Densaýlyq saqtaý mınıstrligi klınıkalyq synaqtardyń II kezeńin ótkizýge resmı ruqsat berdi.
Zertteý «Medtsentr-Rahat» bazasynda júrgizilip jatyr. Oǵan jýsan tozańyna allergııasy rastalǵan 138 patsıent qatysady.
Bul joba otandyq ǵylym men bıofarmatsevtıkany damytýdaǵy, sondaı-aq Qazaqstanda ınnovatsııalyq dárilik preparattardy ázirleýdegi taǵy bir mańyzdy qadam boldy.
Aıta ketelik keıingi 3 jylda allergııalyq asqynýlar 1,5 ese artqany týraly jazǵan edik.
